რამდენიმე კვირის წინ, “მთავარი არხის” ეთერში, გადაცემაში “მთავარი აქცენტები”, არხის გენერალურმა დირექტორმა ნიკა გვარამიამ წერილი გაასაჯაროვა, რომელიც თამარ ბაჩალიაშვილის დამსაქმებელი ერთ-ერთი კომპანია ზაგის ტექნიკურ მენეჯერს, ნიკა გეჯაძეს გაუგზავნეს. კომპანია ზაგის პროგრამების მენეჯერმა ნიკა გეჯაძემ მიიღო “წერილი მომავლიდან”, რომელიც შესაძლოა თამარ ბაჩალიაშვილს გამოეგზავნა.
“ძვირფასო, მე გწერ 2020 წლის 4 აპრილიდან. თუ არ წაგიკითხავს, უკეთესია, მართალია ჩემს თავს დავპირდი, რომ აღარასოდეს მოგწერდი, მაგრამ ეს უნდა გავაკეთო. თუნდაც იმიტომ, რომ საკუთარი თავი აღარ დავადანაშაულო. ნეტა იცოდე რამდენ რამეს გადავაბიჯე ეს რომ მომეწერა. პირველი, რაც მინდა იცოდე ისაა, რომ არასდროს განზრახ ცუდად არ მოვქცეულვარ, გულშიც კი არ გამივლია შენთვის რაიმე ცუდის გაკეთება, არასდროს, არც შეგნებულად და არც შეუგნებლად. პირიქით, იმას უფრო ვუშვებდი, რომ ჩემი თავისთვის დამეშავებინა რამე, ვიდრე შენთვის.
არ ვიცი, რას როგორ აღიქვამდი ან როგორ მიიღე, რა მოგიყვა ან როგორ ჩაგაწვეთა, მაგრამ მერწმუნე, არასდროს განგებ ცუდის ჩადენა არც კი მიფიქრია. ვიცი, რომ ძალიან ბევრ რამეში მადანაშაულებ და არც თუ უსაფუძვლოდ, მაგრამ ახლა თავის მართლებას არ ვაპირებ.
მხოლოდ იმაზე მინდა იფიქრო, როდესაც ჩამოხვედი სულ ცოტა ყურადღება რომ გამოგეჩინა, სულ ცოტათი მაინც, რომ დაინტერესებულიყავი ჩემი არსებობით, ძალიან ბევრი რამე, ძალიან სხვანაირად იქნებოდა. მაგრამ მესმის, როგორი რთული იქნებოდა ეს შენთვის, შენ ხომ ასე ძალიან იყავი დაკავებული (ახსენებს კონკრეტულ ადამიანს)… მახსოვს, ის სიცივე და იგნორი შენი მხრიდან, ამის ფონზე კი შენი დაცვის იმედით გათამამებული შენი მეგობარი როგორ მამცირებდა. არ ერიდებოდა არც მორალურ საზღვრებს და არც არაფერს..
იქნებ ერთადაც გადაწყვიტეთ ასე, რომ ყოველი დღე კოშმარად ქცეულიყო ჩემთვის. შურისძიება გინდოდა, მოახერხე, კმაყოფილი ხარ თუ არა? უფრო მეტად რომ გახანგრძლივებულიყო სიამოვნება გეტყვი, რომ თვითმკვლელობაზე ვიფიქრე არაერთხელ, შენზე ფიქრის გარეშე არ გადამიდგამს არც ერთი ნაბიჯი,” – წერს ანონიმური წერილის ავტორი ნიკა გეჯაძეს.
წერილი გამოძიების მასალებში დევს, თუმცა, მასში მოყვანილი ფაქტობრივი უზუსტობების გამო, ნიკოლოზ გეჯაძე ვარაუდობს, რომ ის თამარ ბაჩალიაშვილის დაწერილი არაა. “მთავარი არხის” გენერალური დირექტორის, ნიკა გვარამიას შეკითხვაზე, რა ურთიერთობა ჰქონდათ თამარ ბაჩალიაშვილსა და ნიკა გეჯაძეს, მენეჯერი პასუხობს, რომ: “მხოლოდ სამსახურეობრივი, მე მისი პირადი თითქმის არაფერი ვიცოდი. როგორც ნებისმიერ სხვა თანამშრომელთან, ისეთი ურთიერთობა მქონდა თამართან”.
სარწმუნო წყაროს ცნობით, დადგენილია, რომ წერილის ავტორი თამარ ბაჩალიაშვილია.
“ადრესატის სახელზე არსებობს სხვა წერილებიც, რომლებიც დათარიღებულია 2030, 2040 და ა.შ. წლებით და რომელთაც ნიკა გეჯაძე მომავალში მიიღებს”, – უთხრა AMBEBI.GE-ს სარწმუნო წყარომ.
ამ ინფორმაციის გადასამოწმებლად თამარ ბაჩალიაშვილის ოჯახის ადვოკატს მიხეილ რამიშვილს დავუკავშირდით.
მიხეილ რამიშვილი:
“და საიდან დამტკიცდაო? ზოგადად, კომპიუტერთან მიმართებაში ბევრი კითხვის ნიშანია. ამერიკიდან ჩამოსასვლელია ბევრი ინფორმაცია და ჩემამდე არაფერი მოსულა. ახლა მნიშვნელოვანი ისაა, ვინ გაიტყუა და ვინ მისდევდა გოგონას, თუ წერილები?
იმაზეა ლაპარაკი 17 ივლისს აფთიაქებში რომ შედიოდა. ინტერნეტ და ვებსაიტები შეიძლება სხვამაც და სხვანაირადაც მოიხმაროს. იყო ეგ წერილი, ამოღებულიცაა, მაგრამ მას ეკუთვნოდა, თუ არა, ჯერ დადგენილი არ არის. ამაზე მნიშვნელოვანი იმ წერილების და მიმოწერის აღდგენაა, რაც გოგონას ლეპტოპშია წაშლილი.
ამას ველოდებით და სასიყვარულო წერილები, არ ვიცი, ჯერ არ არის დადგენილი, მისია, თუ – არა. რომც იყოს, რაა, რო? ანუ ეს როგორი მომენტია, იცით? გამოძიება ისევ თვითმკვლელობის ვერსიას “აწვება”. 23-შივე გამოვიდა მამუკა ჭელიძე და თქვა, თვითმკვლელობააო და ამით დავამთავროთ ყველაფერი? არ არის ეს თვითმკვლელობა და არც ამით დამთავრდება ყველაფერი!”
ამბები