თეონა თამაზაშვილი კელი დეგნანს მიმართავს – გამოძიებაში გფბ უნდა ჩაერთოს

გარდაცვლილი თამარ ბაჩალიაშვილის ოჯახი აპირებს გამოძიებაში ამერიკის შეერთებული შტატების გამოძიების ფედერალური ბიუროს (გფბ) ჩართვა მოითხოვოს. ამის შესახებ ბაჩალიაშვილის დედამ, თეონა თამაზაშვილმა ჟურნალისტებს განუცხადა.

მისი თქმით, ის აშშ-ის ელჩს პირადად მიმართავს.

“მე, ალბათ, გფბ-ს ჩართულობას მოვითხოვ. უშუალოდ მივმართავ ელჩს. თუ პროკურატურა უარს გვეტყვის, ეს ცხადზე ცხადი იქნება, რომ არ აწყობთ და თვითონ არიან დამნაშავეები”, – განაცხადა თამარ ბაჩალიაშვილის დედამ.

ცნობისთვის, თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი სათვალთვალო კამერებმა ბოლოს თეთრიწყაროს რაიონში დააფიქსირეს. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს.

ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.