31 წლის ლევან ზურაბიშვილს, რომელმაც გუშინ მთელი საზოგადოების ყურადღება მიიპყრო, ირკვევა, რომ ხელში ხელყუმბარა არ ეჭირა. მას უბრალოდ, ყუმბარის ფორმის სანთებელა ჰქონდა და ხელყუმბარის იმიტაცია გააკეთა. ამის შესახებ მისი ადვოკატი ირმა ჭკადუა საუბრობს. მას შემდეგ, რაც ლევან ზურაბიშვილი დააკავეს, ცნობილმა იურისტმა თავად გამოთქვა სურვილი, უანგაროდ დაეცვა ბრალდებული.
ადვოკატი ირმა ჭკადუა:
– ამბობს, არ მინდა ჩემმა 12 წლის შვილმა გაიაროს იგივე გზა, რომელიც მე გავიარეო და ამიტომ ითხოვს ამ ონლაინ თამაშების აკრძალვას. ამბობს, მყავს ასევე პენსიონერი დედა, ვხედავ, რამდენად მძიმეა ყოველი მისი მისვლა აფთიაქში, რადგან ვერ ავუდივართ წამლების ფასებს და ეს აუცილებელი საჭიროებააო.
– არ ჰქონია ხელყუმბარაც…
– ეს არ იყო ხელყუმბარა, ეს იყო სანთებელა, რომელიც იყო ოქროსფერი და მან შეღება მუქად მეტი დამაჯერებლობისთვის.
– იმ მიკროსაფინანსოში ვალი აქვს და იმიტომ მივიდა?
– რატომღაც აქ აღმოვჩნდიო, განსაკუთრებული ნიშნით არ აურჩევია.
– საქმის კვალიფიკაციაზე რას იტყვით?
– იარაღის ნაწილი და ყაჩაღობა მოეხსნება, რადგან მას არც ერთი თეთრი არ მოუთხოვია. როდესაც მოლარე გოგონა გამოვიდა სალაროდან, მას სთხოვა, სალაროს კარი დაეკეტა, რომ ვინმეს არ ეფიქრა, რომ რაიმე შემხებლობა ფულთან ჰქონდა. დარჩება უკანონოდ თავისუფლების აღკვეთა. იქ მყოფი ადამიანების ჩვენებებზეა დამოკიდებული ყველაფერი.
– ის მთვრალი იყო?
– არ იყო ნასვამი, არც ნარკოტიკების ზემოქმედების ქვეშ არ იყო. დაკარგა სახლი, ახლა რაც მას აქვს, იმის დაკარგვის წინაშეც დგას. მას ჰყავს მოხუცი დედა, რომელიც ქუჩაში რჩებოდა.
ამბები