სალომე ზურაბიშვილის მიერ გიორგი რურუას შეწყალებას ეხმაურება აშშ-ის მოქალაქე თამარ თორაძე და მიიჩნევს, რომ პრეზიდენტმა უსამართლო გადაწყვეტილება მიიღო.
მას 90-იან წლებში მთელი ოჯახი ერთ დღეს ამოუხოცეს. თამარ თორაძე საკუთარი ძმების, იმედო და კახა თორაძეების, დაცხრილვაში ბრალს გიორგი რურუას სდებს და იხსენებს, როგორ ჩახედა თვალებში და იცნო რურუა, რომელმაც ავტომატის ჯერი მის თვალწინ გადაატარა მის ძმებს.
– როცა პირველად გამოვიდა ტელევიზიით სალომე ზურაბიშვილი და თქვა, რომ უნდა შეეწყალებინა ჟორიკა რურუა, ვერ დავიჯერე. რაღაც შეცდომა მეგონა. ახლაც გაოგნებული ვარ. წარმოუდგენელია! მკვლელი გამოუშვეს გარეთ, რომელმაც ოჯახი დამიხოცა თვალწინ. სალომე ზურაბიშვილი უნდა გადადგეს.
– საქმის გამოძიების პროცესში თანადგომა გამოგიცხადათ გფბ-მ. სიახლეები ხომ არ არის?
– გფბ შუამავალია. ის იცავს ჩემს ინტერესებს, რათა გამოძიებამ ისე ჩაიაროს, რომ მე თმის ღერი არ ჩამომვარდეს. მთავარია, რომ საქართველოში დაიძრას საქმის გამოძიების პროცესი.
– როგორ აპირებთ ბრძოლას?
– ჯერ ველოდები რას იზამს საქართველოს ხელისუფლება. შემდეგ ვაპირებ ამერიკის სასამართლოში ბრძოლას “ზარალასთან” (გიორგი რამიშვილი, “სილქ როუდ ჯგუფის” დამფუძნებელი) და ეს პროცესშია. მივმართავ პროკურატურას, გამოფხიზლდნენ! მესმის, რომ “ზარალას” ძმაკაცები არიან იქ, მაგრამ უკვე ამოვიდა ყელში ყველაფერი. მოვუწოდებ საქართველოს მთავრობას, საქმე გამოიძიონ. ასევე, მივმართავ საზოგადოებას, გაუფრთხილდნენ თავს, ქალაქში მკვლელი დადის!
ამბები