წითელი ჯვრის დახმარებით პატიმარი ზაზა გახელაძე ციხეში ცოლს, ქალიშვილებს და მამას შეხვდა.
ზაზას მეუღლე ირმა ბუთხუზი რადიო თავისუფლებას ქმართან შეხვედრის დეტალებს უყვება.
“ძალიან უიმედოდ არის. ერთადერთი, რისი იმედიც გამიჩნდა, ისიც ორ საათში მომიკვდაო. რუსი ჯარისკაცების დაკავებას გულისხმობდა და მაშინ მიეცა იმედი, რომ გაცვლიდნენ. (7 მარტს, შსს-მ სოფელ ხურვალეთში, საოკუპაციო ძალების ორი შეიარაღებული პირი დააკავა და მალევე გაათავისუფლა).
ციხეში ზაზას სულ ეუბნებიან, რა გაუხდა თქვენ მთავრობას, რომ ერთი ოსი დათმონ და შენ გაგცვალონო. ზაზას არ ეუბნებიან, ვისზეა ლაპარაკი, მაგრამ ეუბნებიან, რომ საქართველოს ოსები ჰყავს დაკავებული და არ გცვლიანო. ზაზას უთქვამს, ვიცი, რომ ოქონის ხატის ამბავზე (საუბარია ოქონის ტრიპტიკონზე, რომელიც საქართველოს მუზეუმშია და მასზე პრეტენზიას დე ფაქტო ხელისუფლება აცხადებს) და ჩორჩანას საგუშაგოს აღებაში არ გამცვლიანო.
ზაზას კითხვები უჩნდება, თუ მართლა არის ვინმე ოსი საქართველოში დაკავებული, რატომ არ მცვლიანო. ძალიან უიმედოდ არის. ბავშვებს რომ ეფერებოდა, ასე ეუბნებოდა, ალბათ რომ გამოვალ, უკვე დიდები იქნებით და ვეღარ ჩაგეხუტებით და მოგეფერებითო. დაკავებაზე რომ ვკითხე, ასე მიპასუხა-ერთი იცოდე, რომ მე არ მისვრია და არც იქით მხარეს გადავსულვარო. და ამ თემაზე და თავის პრობლემაზე აღარაფერი მითხრა.” – ამბობს ირმა ბუთხუზი.
დე-ფაქტო სამხრეთ ოსეთის სასამართლომ 2021 წლის 5 თებერვალს 33 წლის ზაზა გახელაძეს 12 წლითა და 6 თვით პატიმრობა მიუსაჯა.
ქართლი