ესპანეთის პოლიცია 39 წლის მამაკაცის გარდაცვალების დეტალებს იძიებს, რომლის ცხედარიც ბარსელონას გარეუბანში, სანტა-კოლომა-დე-გრამენეტში, სტეგოზავრის დეკორატიულ ქანდაკებაში იპოვეს.
შაბათს, “დინოზავრთან” ახლოს სეირნობისას მამა-შვილმა მძაფრი სუნი იგრძნეს, რომელიც დინოზავრის ფიგურიდან მოდიოდა. მამამ ცხედარი დინოზავრის ფეხზე არსებული ბზარიდან შეამჩნია.
სამართალდამცავების განცხადებით, შემთხვევამდე ცოტა ხნით ადრე, მამაკაცის ოჯახმა მის გაუჩინარებასთან დაკავშირებით პოლიციაში განაცხადა.
ადგილზე მეხანძრეების 3 ბრიგადა გამოიძახეს, რომლებმაც ფიგურის ფეხი გაჭრეს და ცხედარი ამოიტანეს.
ადგილობრივი მედიის ცნობით, ვარაუდობენ, რომ მამაკაცი ფიგურაში ჩავარდნილი მობილური ტელეფონის ამოტანას ცდილობდა, როდესაც დინოზავრში თავად ჩავარდა. მამაკაცი ხაფანგში აღმოჩნდა, რის გამოც დასახმარებლად ვერავის უხმო.
პოლიცია ცხედრის გაკვეთის შედეგებს ელოდება, რათა მამაკაცის გარდაცვალების მიზეზი გაირკვეს.
რუსთავი 2