თბილისში გარდაცვლილი ყაზახი გოგონას საქმეზე ახალი დეტალები ხდება ცნობილი. ირკვევა, რომ მასზე ორჯერ იძალადეს. საქმეში მისი ნათესავიც ფიგურირებდა, რომელმაც 26 წლის ქალი საქართველოში სამუშაოდ ჩამოიყვანა.
როგორც გარდაცვლილის და “მთავარ არხს” უყვება, საქმეში ფიგურირებს ჩანაწერიც, რომელიც გარდაცვალებამდე ცოტა ხნით ადრე ასელ აიპაევამ მეგობარს გაუგზავნა.
“შემთხვევის შესახებ არაფერი ვიცი, მხოლოდ ჩანაწერი მაქვს მოსმენილი, რომელიც გარდაცვალებამდე ცოტა ხნით ადრე მეგობარს გაუგზავნა. ამ ჩანაწერში ნათქვამია, თუ როგორ ამცირებდნენ და ძალადობდნენ მასზე. ვიცი, რომ ერთს ბესო ჰქვია, ის ქართველია, მეორე კი მურად მეირბეკოვი, ის საქართველოში ცხოვრობს და მანდ სხვა გვარი აქვს. იყო მესამე კაციც, მისი სახელი არ ვიცი, ქართველი 50-წლამდე კაცია.
როგორც მე ვიცი, ჩემი და სამსახურში გამოიძახეს იმ დღეს, ჩანაწერში ისმის თუ როგორ ეუბნებიან, რომ ის ყაზახებმა ქართველებს მიჰყიდეს. ამას ჩანაწერით გეუბნებით, ორჯერ იძალადეს ჩემს დაზე. ახმედოვი ჩვენი ნათესავია, მან ჩამოიყვანა ჩემი და საქართველოში, ის მანქანების გადაზიდვით იყო დაკავებული და ოფისში სამუშაოდ ჩაიყვანა ჩემი და საქართველოში”, – ამბობს გარდაცვლილის და “მთავართან” საუბარში.
“კურიერმა” დიდუბეში მომხდარ შემთხვევამდე რამდენიმე წუთით ადრე 26 წლის გოგონას მიერ გაკეთებული აუდიო ჩანაწერები მოიპოვა.
ჩანაწერში მამაკაცი, სახელად ბესო, ქალს ემუქრება და შეურაცხმყოფელი სიტყვებით მოიხსენიებს და მოუწოდებს, რომ ნათქვამი შეასრულოს და ფანჯრიდან გადახტეს.
“დაგმდუღრავ… რატომ არ გადახტი ფანჯრიდან?”- მიმართავს მამაკაცი ქალს.
სხვა ჩანაწერში ქალი ამბობს, რომ ის მუქარის მსხვერპლია და სიცოცხლე აღარ შეუძლია.
26 წლის ყაზახმა გოგონამ 5 მაისს სიცოცხლე თვითმკვლელობით დაასრულა. შსს-მ 6 მაისს დააკავა პირი, რომელმაც ის სიცოცხლის მოსპობის მუქარით გააუპატიურა, პროკურატურამ კი მას ბრალი 7 მაისს წარუდგინა.