ბორჯომში ლევან ნამგალაძის მკვლელობაში ბრალდებული პირი სქიმაში აღკვეცილი ბერი, 1986 წელს დაბადებული ანტონ მაისურაძეა.
ლევან ნამგალაძის ახლობლების ინფორმაციით, მაისურაძესა და ნამგალაძეს შორის უთანხმოება მოხდა, რაც მკვლელობის მიზეზი გახდა.
“ლევან ნამგალაძეს და ბრალდებულ სასულიერო პირს ერთმანეთთან საკმაოდ კარგი ურთიერთობა ჰქონდათ, ხანგრძლივი დროის განმავლობაში ახლობლობდნენ და ხშირად სხვადასხვა ადგილზე ერთადაც ჩნდებოდნენ.
მკვლელობის ღამეს არანაირ “გარჩევებს” და კრიმინალურ ჯგუფებს შორის დაპირისპირებას ადგილი არ ჰქონია. გვიან ღამემდე ახლობლები ლიკანში იმყოფებოდნენ ლევან ნამგალაძესთან სახლში, საკმაოდ გვიან დაიშალნენ. ამბობენ, რომ იმ ღამით ნამგალაძეს და მამაოს რამდენჯერმე ჰქონდათ სატელეფონო საუბარი და კამათი მოუვიდათ, ამის შემდეგ ბორჯომში, ინგოროყვას ქუჩაზე შეხვდნენ ერთმანეთს.
მათ მოუვიდათ კონფლიქტი, როგორც ვიცით, ლევანმაც ისროლა, თუმცა სროლის შედეგად არავინ დაშავებულა და ამის შემდეგ მას მიაყენა ბრალდებულმა სხეულის დაზიანებები, რაც გარდაცვალების მიზეზი გახდა. როგორც ვიცით, არტერია ჰქონდა დაზიანებული და საავადმყოფოში მიყვანამდე დიდი რაოდენობით სისხლი დაკარგა” – აცხადებს Ambebi.ge-სთან მოკლულისა და ბრალდებულის ახლობელი.
ბორჯომელების ინფორმაციით, საავადმყოფოს ტერიტორიამდე მძიმედ დაჭრილი ნამგალაძე ბრალდებულმა თავად მიიყვანა.
“სასულიერო პირი წარმოშობით ბორჯომელია, ჯერ წალკაში იყო, სადაც, მისი მოძღვარი მსახურობდა, ახლა რომელ ეპარქიაში ირიცხება ოფიციალურად, არ ვიცით, მაგრამ ბორჯომში ხშირად იყო, მამა აქაური ჰყავს. ლევანთან და მის მეგობრებთანაც ახლობლობდა და მათთან ხშირად ვხედავდით. ვერავინ წარმოიდგენდა, რომ ამგვარი კონფლიქტი მოხდებოდა და ასეთი შედეგით დასრულდებოდა“, – ამბობს Ambebi.ge-ს რესპონდენტი.
ამბები