საქართველოს პარლამენტმა აზარტული თამაშების შესახებ კანონი მესამე მოსმენით მიიღო. კანონპროექტს მხარი 82-მა დეპუტატმა დაუჭირა, 1 კი წინააღმდეგი იყო.
ცვლილებები რამდენიმე კანონში შედის, მათ შორის, ლატარიების, აზარტული და მომგებიანი თამაშობების მოწყობის შესახებ; რეკლამის შესახებ; ადმინისტრაციულ სამართალდარღვევათა კოდექსში, საგადასახადო კოდექსში და სხვა.
რაც შეეხება კანონით გათვალისწინებულ აზარტული თამაშების რეკლამის აკრძალვას – მესამე მოსმენით მას მხარი 81-მა დეპუტატმა დაუჭირა, 2 კი წინააღმდეგი იყო.
აზარტული თამაშების რეკლამა 1 მარტიდან აიკრძალება.
ცვლილებათა პაკეტი “ქართულმა ოცნებამ” პრემიერმინისტრ ირაკლი ღარიბაშვილის ინიციატივის გახმოვანების შემდეგ მოამზადა.
კანონპროექტის მიხედვით:
თამაშზე დამოკიდებულ და აკრძალულ პირთა სიას აწარმოებს შემოსავლების სამსახური. დამოკიდებულ და აკრძალულ პირთა სიაში დასაშვებია მხოლოდ საქართველოს მოქალაქის მონაცემების შეტანა.
დამოკიდებულ პირთა სიაში პირის მონაცემების შეტანა ხდება:
ა) თავად დამოკიდებული პირის მიმართვის საფუძველზე, რომელიც შესაბამის განაცხადს წარადგენს შემოსავლების სამსახურში დამოკიდებულ პირთა სიაში მისი მონაცემების შეტანის თაობაზე;
ბ) სასამართლოს ბრძანების საფუძველზე, საქართველოს ადმინისტრაციული საპროცესო კოდექსის შესაბამისად.
3. დამოკიდებულ პირთა სიაში პირის შეტანა ხდება 5 წლის ვადით.
4. დამოკიდებულ პირთა სიიდან, პირის მონაცემების ამოღება შესაძლებელია სასამართლოს ბრძანების საფუძველზე, ამავე პირის მონაცემების დამოკიდებულ პირთა სიაში შეტანიდან არაუადრეს 3 წლისა ან „საქართველოს მოქალაქეობის შესახებ“ საქართველოს ორგანული კანონის შესაბამისად საქართველოს მოქალაქეობის შეწყვეტის შემთხვევაში.
5. დამოკიდებულ პირთა სიის წარმოების წესი განისაზღვრება საქართველოს ფინანსთა მინისტრის ნორმატიული აქტით;
კანონის მიხედვით, დამოკიდებულ პირთა სიაში მყოფი ადამიანი, თამაშის შემთხვევაში, პირველ ჯერზე 10 ათასი ლარით დაჯარიმდება, განმეორების შემთხვევაში – 20 ათასი ლარი. იგივე ოდენობის ჯარიმებია განსაზღვრული იმ დაწესებულებისთვის, ვინც დამოკიდებულ პირს სათამაშოდ დაუშვებს.