ღარიბაშვილმა რობერტს სტურუას ნახევარ მილიონზე მეტი ღირებულების სახელმწიფო ქონება 1 ლარად მისცა – ძღვენი რეჟისორმა “ქართლი ოცნების” მხარდამჭერი ინტერვიუს შემდეგ და გადამწყვეტი არჩევნების წინ მიიღო.
ყველაფერი 2021 წლის 3 ნოემბერს დაიწყო – არჩევნებიდან 3 დღეში მთავრობამ 1945-ე განკარგულება გამოსცა და ქონების მართვის სახელმწიფო სააგენტოს რობერტ სტურუასთვის მიწის ნაკვეთის და მასზე არსებული შენობა-ნაგებობის 1 ლარად მიყიდვა დაავალა. კონტრაქტში სტურუა მყიდველად, ქონების მართვის სააგენტო კი გამყიდველად არიან მოხსენიებული.
ქონება, რომელიც ღარიბაშვილმა რობერტ სტურუას ერთ ლარად მიჰყიდა, ლისის ტბის მიმდებარედ სოფელ თხინვალაში, კეჭაყმაძის ქუჩის 2 ნომერში მდებარეობს.
“შაბათის ეთერმა” მოიპოვა ქონების მართვის სააგენტოსა და რობერტ სტურუას შორის გაფორმებული ხელშეკრულება, სადაც წერია, რომ სტურუამ ეს ქონება ნამდვილად ერთ ლარად მიიღო, თუმცა დანარჩენ საბუთებს პრემიერი მინისტრი მალავს. 1945-ე განკარგულება, რომელიც არჩევნების შემდეგ, ირაკლი ღარიბაშვილმა გამოსცა, საქართველოს მთავრობის ვებ გვერდზე ატვირთული არ არის. “ტვ პირველის” რეპორტიორები მთავრობის ადმინისტრაციაში იმის გასარკვევად მივიდნენ, სად არის პრემიერის განკარგულება და რა ვალდებულებით გადასცა რობერტ სტურუას მიწა ერთ ლარად?, თუმცა ირკვევა, რომ პრემიერ მინისტრის ყველა მის განკარგულებას მალავს, არ ტვირთავს არც ვებ გვერდზე და არ აქვეყნებს არც საკანონმდებლო მაცნეში.
რობერტ სტურუასთვის გადაცემული ქონების ამბავი ამით არ დამთავრებულა, ახლა მთავარი – “შაბათის ეთერმა” გაარკვია, როგორ იშოვეს ღარიბაშვილის მიერ ერთ ლარად გადაცემული ხალხის კთვნილი მიწით რამდენიმე დღეში ნახევარ მილიონზე მეტი?
“ოცნების” მთავრობისგან მიღებული ძვირფასი საჩუქარი რობერტ სტურუამ მალევე, ზუსტად 19 დღეში, გააჩუქა. ქონება დიდი რეჟისორისგან, ვინმე როინ ნოზაძემ მიიღო. ნოზაძე სტურუას ახლო მეგობარია. ის აფორმებდა საბუთებს, სტურუას სახელით, როდესაც საქართველო მთავრობა არჩევნების შემდეგ რეჟისორს მიწას ლარად აძლევდა, მაგრამ რობერტ სტურუა ამტკიცებს, რომ არ იცნობს პირს, ვისაც ნოტარიულად მისი სახელით მოქმედების უფლება მისცა და ვისაც 600 ათას ლარიანი ქონება აჩუქა.
2 დეკემბერს, რობერტ სტურუასგან ნაჩუქარ მიწას მისი მეგობარი და ნდობით აღჭურვილი პირი 200 ათას დოლარად ყიდის.
აკაკი მოწონელიძე იმ კომპანიის მფლობელია, რომელმაც რობერტ სტურუასთვის ლარად მიცემულ ქონებაში, 200 ათასი დოლარი გადაიხადა. ყოფილი სპორტსმენი და ახლა უკვე ბიზნესმენი მოწონელიძე, ლისის გზაზე, სავაჭრო ობიექტის მშენებლობას გეგმავს. მოწონელიძე გორის მოჭიდავე მერის, ლადო ხინჩეგაშვილის ბიზნეს პარტნიორია. ისინი ერთად ფლობენ კომპანია “რეფრეშს”.
აქვს თუ არა სპორტსმენ მერს კავშირი, რობერტ სტურუასა და ოცნების ხელისუფლებას შორის შემდგარ, სავარაუდო კორუფციულ გარიგებას შორის, რთული სათქმელია. უტყუარი ფაქტი არის ის, რომ რობერტ სტურუამ, 1 ლარში, ნახევარ მილიონზე მეტი იშოვა და ამისთვის მხოლოდ 20 დღე დასჭირდა.
სად წავიდა სახელმწიფო ქონების გასახვისებით მიღებული ფული? ნახეთ მაკა ჩიხლაძის ხმაურიანი ჟურნალისტური გამოძიება.
პირველი