საგანგებო სიტუაციების მართვის სამსახურის ინფორმაციით, უნივერსიტეტის ქუჩაზე, ახალი სპორტის სასახლეში გაჩენილი ხანძარი ლიკვიდირებულია. როგორც გავრცელებულ განცხადებაშია ნათქვამი, ადგილზე საგანგებო სიტუაციების მართვის სამსახურის 20 ჯგუფი მუშაობდა:
“შინაგან საქმეთა სამინისტროს მეხანძრე-მაშველების რეაგირების შედეგად დედაქალაქში, უნივერსიტეტის ქუჩაზე მდებარე სპორტის სასახლის მშენებარე შენობაში გაჩენილი ხანძარი ლიკვიდირებულია.
შინაგან საქმეთა სამინისტროს საზოგადოებრივი უსაფრთხოების მართვის ცენტრ “112”-ში შემოსული ინფორმაციით, სპორტის სასახლის მშენებარე შენობაში იყო ხანძარი. შეტყობინების მიღებიდან უმოკლეს დროში, ადგილზე გამოცხადდნენ საგანგებო სიტუაციების მართვის სამსახურის მორეაგირე ჯგუფები და დაიწყეს ხანძრის ქრობის აქტიური სამუშაოები. ცეცხლი გავრცელებული იყო შენობის კედელზე, გარე ფასადსა და სახურავზე, ასევე, გვერდით მდებარე, მოქმედი სპორტის სასახლის უკანა კედელზეც.
ადგილზე მუშაობდა საგანგებო სიტუაციების მართვის სამსახურის 20 ჯგუფი.
შემთხვევის შედეგად დაშავებული არავინ არის, ხანძრის გაჩენის მომენტში შენობაში მყოფმა ყველა მოქალაქემ ტერიტორია უვნებლად დატოვა” – ნათქვამია განცხადებაში.
ნიუპოსტი