ამერიკის ოფიციალური პირების თქმით, რუსეთმა ჩინეთს სთხოვა, უკრაინის ომში სამხედრო აღჭურვილობით დაეხმაროს. ამის შესახებ New York Times წერს.
ოფიციალური წყაროს ინფორმაციით, რუსეთმა ჩინეთს, ასევე, სთხოვა დამატებითი ეკონომიკური დახმარება, რათა აღადგინოს ის ეკონომიკური ზარალი, რომელიც რუსეთს შეერთებული შტატების, ევროპისა და აზიის ქვეყნების მიერ დაწესებული ფართო სანქციებისგან მიადგა.
როგორც სტატიაში ვკითხულობთ, ჩინეთის პრეზიდენტმა სი ძინპინმა გააძლიერა პარტნიორობა პუტინთან და გვერდში დაუდგა მას მაშინ, როცა რუსეთი აძლიერებს სამხედრო კამპანიას, ანადგურებს ქალაქებს უკრაინაში და კლავს ასობით ან ათასობით სამოქალაქო პირს. ამერიკელი ოფიციალური პირები ყურადღებით აკვირდებიან ჩინეთს, იმოქმედებს თუ არა რუსეთის თხოვნაზე და დაეხმარება თუ არა მას.
„ჩვენ პირადად ვუკავშირდებით პეკინს, რომ რუსეთისთვის სანქციების თავიდან აცილების მცდელობებზე ან რუსეთის მიმართ მხარდაჭერაზე შედეგები ფართომასშტაბიანი იქნება“, – განაცხადა სალივანმა CNN-ის ეთერში.