ისრაელში, თელ-ავივის ცენტრში სროლის შედეგად, 2 ადამიანი დაიღუპა, ხოლო 8 – დაიჭრა.
აღნიშნულის შესახებ ინფორმაციას ისრაელის მედია, იჩილოვის სამედიცინო ცენტრის ოფიციალურ პირებზე დაყრდნობით ავრცელებს.
მათივე ინფორმაციით, დაჭრილებიდან 2 ადამიანი გარდაიცვალა, ხოლო საავადმყოფოში კიდევ 8 დაჭრილს მკურნალობენ, მათგან ოთხს ოპერაცია უტარდება და მძიმე მდგომარეობაშია, კიდევ ორი საშუალო სიმძიმისაა, ხოლო ორი კი – მსუბუქადაა დაშავებული.
ტრანსპორტის სამინისტროში აცხადებენ, რომ პოლიციის მოთხოვნით, თელ-ავივის ცენტრში საზოგადოებრივი ტრანსპორტის მუშაობა გაჩერებულია, რადგან პოლიციელები მსროლელის ძებნას აგრძელებენ.
პოლიცია მოსახლეობას მოუწოდებს თავი შეიკავონ თავდასხმის ადგილისკენ გადაადგილებისგან, რადგან შეკრებილი ხალხი პოლიციელების მუშაობას ართულებს.