სამართალდამცავებმა ზუგდიდის საკრებულოს აპარატის უფროსი დააკავეს. როგორც „ინტერპრესნიუსის“ კორესპონდენტი ადგილიდან იუწყება, მისი დაკავების ზუსტი მიზეზი ამ დრომდე უცნობია, თუმცა წინასწარი ინფორმაციით, საქმე ნარკოტიკებს უკავშირდება. შსს-ში ფაქტზე კომენტარს ჯერჯერობით არ აკეთებენ.
ამასთან, წუხელ ღამით სამართალდამცავებმა ზუგდიდში ადგილობრივი მკვიდრი ლევან ხვიტიაც დააკავეს, რომელსაც, მისივე ადვოკატის ინფორმაციით, საექსპერტო-კრიმინალისტიკურ დეპარტამენტში შემოწმებისას მარიხუანას მოხმარება დაუდგინდა.
ადვოკატ გონელი მარღანიას განმარტებით, ხვიტიას სახლის ჩხრეკისას ამოღებულია გარკვეული ნივთიერება, რომელსაც ექსპერტიზა სწავლობს და ამ საკითხზე გამოიძიება „სისხლის სამართლის კოდექსის“ 260-ე მუხლით მიმდინარეობს, რაც ნარკოტიკების შეძენა-შენახვას გულისხმობს.
ადვოკატის მტკიცებით, ხვიტიას დაკავებას ქალაქ ზუგდიდის საკრებულოს აპარატის უფროსის გრიგოლ მიქავას დაკავებასთან კავშირი არ აქვს.
ინტერპრესნიუსი
ლევან სულაშვილის ფოტო