თამთა შედანიას ჩაქაფული შამპანურით და ლუდში დამბალი ხორცით

თამთა შედანიას ჩაქაფული შამპანურით და ლუდში დამბალი ხორცითმოდელი თამთა შედანია ჟურნალ “სარკეში” ისეთ კულინარიულ ექსპერიმენტებზე საუბრობს, გაოცებული დარჩებით. თურმე პირველად 14 წლისამ მოამზადა 30 კვერცხიანი ტორტი ჟოლოთი და მარწყვით. ახლა, როცა ტკბილეული მოუნდება, მაგალითად, კექსი, 20 წუთში თავად ამზადებს. შვილისთვის კი ცალკე მენიუ აქვს შედგენილი.
თამთა შედანია:
– მიას ძალიან უყვარს ჩემი მოგონილი წვნიანი, რომელიც ჩემი საფირმო სუპია და “სარკის” მკითხველებსაც ვასწავლი.
აიღეთ ერთი ქილა ბარდა, ორი წითელი ბულგარული წიწაკა, ერთი თავი ხახვი, ერთი კბილი ნიორი, ორი ცალი გახეხილი სტაფილო, ოთხი მოზრდილი კარტოფილი, კუბიკებად დაჭრილი, ერთი ცალი ბულიონის კუბიკი, ერთი კონა კამა და ერთი სუფრის კოვზი ტომატი.
პირველ რიგში, მოშუშავთ ნიორს და ხახვს. კარგად რომ შერბილდება, კარტოფილს დააყრით, შემდეგ ბარდას, მერე ბულგარულს და სტაფილოს. ყველაფერი კარგად რომ მოითუშება, დაამატებთ ლიტრანახევარ წყალს. მერე გემოვნებით უზამთ მარილს, ბულიონის კუბიკს და ტომატს. ბოლოს კამას დაამატებთ. როცა ბლანტ მასას მიიღებთ, სუპი მზად არის.
ძალიან მიყვარს სალათები და ვცდილობ, კრეატიული სალათები გავაკეთო, მაგალითად, ავოკადო და ანანასი ერთად.
– როგორ აკეთებთ?
– ერთ კონა სალათის ფოთოლს კარგად გარეცხავთ და სათითაოდ გაამშრალებთ, რომ სალათი არ გაწყალდეს. ერთ ცალ წითელ ბულგარულს გრძლად გახეხავთ, ასევე ერთ ცალ სტაფილოს და ერთ კბილ ნიორს. ბოსტნეულს მოასხამთ ერთ სუფრის კოვზ ბალზამიკოს და ერთ სუფრის კოვზ ზეითუნის ზეთს. დაკონსერვებული ანანასის ერთ ფირფიტას წყალს გადაავლებთ, რომ სალათი არ დაატკბოს და თავის გემოზე არ გადაიყვანოს. წვრილად დაჭრით და ბოსტნეულს უზამთ. ცოცხალი ანანასი უკეთესია. მასთან ერთად დაჭრილ ავოკადოსაც ჩაყრით.
ბოლოს ორ ნაჭერ მოხარშულ ქათმის ფილეს დაძენძავთ და დაამატებთ. ამას ჰქვია თამის სალათი. თუ გექნებათ იმის საშუალება, რომ დაამატოთ 100 გრამი ნიგოზი ან ნუში, ძალიან კარგი იქნება.
– ბევრჯერ მსმენია თქვენგან, რომ გურმანი ხართ, თუმცა ეს თქვენს წონას ნამდვილად არ ეტყობა. როგორ ახერხებთ ამას?
– ეს გენეტიკის ამბავია. ძალიან მიყვარს გემრიელად ჭამა – ხინკალი, ქათმის, ხბოს მწვადი, ჩაქაფული… ისეთ ჩაქაფულს ვამზადებ, სხვაგან გასინჯული არ გექნებათ. ამ კერძს ყოველთვის მაშინ ვამზადებ, როცა ახალი ტყემალი შემოდის.
– როგორ მზადდება თამთა შედანიას ჩაქაფული?
– ჩემი ჩაქაფული თეთრი ღვინით და შამპანურით კეთდება. შამპანური ოდნავ სიტკბოს აძლევს და ძალიან გემრიელი გამოდის.
ერთ პატარა ხრიკს გასწავლით, რომელიც ერთ-ერთი ცნობილი შეფმზარეულის წიგნში წავიკითხე. სანამ ხორცს შეწვავთ ან მისგან სადილს მოამზადებთ, ერთი საათით ლუდში ჩადეთ. ხორცი ფაფუკი ხდება და, რომ იტყვიან, პირში დნება.
– ლუდის არომატს არ იღებს ხორცი?
– არა. ლუდიდან რომ ამოიღებთ, უნდა გარეცხოთ. შეწვის და მოხარშვის დროს ძალიან ფაფუკია. თუ ჩაქაფულისთვის ხბოს ხორცი არ გაქვთ, შეგიძლიათ საქონლის ხორცით მოამზადოთ, ოღონდ წინასწარ ლუდში ჩაალბეთ. ასე დამუშავებული საქონლის ხორცი ხბოსას ჯობია.
– დავუბრუნდეთ ჩაქაფულის რეცეპტს.
– კარგად გარეცხავთ ათ კონა ტარხუნას, ორ კონა მწვანე ხახვს, თითო-თითო მოზრდილ კონა ქინძს და ოხრახუშს, ათ ცალ ტყემალს. მწვანილი დაჭერით, ხორციც, ოღონდ წვრილად. ეს ყველაფერი ფენა-ფენა ჩაალაგეთ ქვაბში, მოასხით ერთი ჭიქა თეთრი ღვინო (ტკბილი არ უნდა იყოს) და ერთი ჭიქა შამპანური.
აჯობებს, თუ ხორცს მოაყრით პილპილს, ხარჩოს სუნელს, ყვითელ ყვავილს, კარის. მთავარი ის არის, რომ ძალიან დაბალ ცეცხლზე უნდა დადგათ. შამპანური ამ კერძს თავის სურნელს აძლევს, თანაც ის მწვანილს ბოლომდე ცოცხლად ინახავს, ბოლომდე არ ხარშავს.
მითია ის, როცა ამბობენ, კეთება არ ვიცითო. მარტო როცა რჩები, იცი თუ არ იცი, აკეთებ. ასე რომ, გასაკვირი არაფერია, როცა ქალმა გემრიელი საჭმელების მომზადება იცის.
ლანა კიკნაძე, ჟურნალი “სარკე”