კაფე „ლეღვი“ უკვე ერთი წელია, რაც სარესტორნო ბიზნესში გამოჩნდა, ის ლეღვთახევში მდებარეობს. როგორც „კომერსანტთან“ საუბრისას მისი თანადამფუძნებელი ნათია ნადირაშვილი აცხადებს, კაფეზე მოთხოვნა დიდია და დღის განმავლობაში „ლეღვი“ სრული დატვირთვით მუშაობს.
ნადირაშვილი ჩვენთან კაფეს დაფუძნების ისტორიასა და მის სამომავლო განვითარებაზე საუბრობს.
– კაფე “ლეღვი” ერთი წლის წინ დაფუძნდა. ლეღვთახევის რეაბილიტაციის დასრულებისთანავე გაჩნდა იმის საჭიროება, რომ აქ მსგავსი სახის ობიექტი ყოფილიყო. თავდაპირველად ჩვენი კაფე სასმელებითა და მსუბუქი მისაყოლებლებით შემოიფარგლებოდა, რადგან ეს ტურისტული ზონაა. თუმცა დროთა განმავლობაში ეს ადგილი ქართველებისთვისაც მიმზიდველი გახდა და მოთხოვნამაც იმატა.
კაფე „ლეღვი“ ერთი სართულისგან და ვერანდისგან შედგება, თქვენ ასევე შესაძლებლობა გაქვთ ღია ცის ქვეშ, პირველ სართულზეც დატკბეთ ჩვენი სარესტორნო მომსახურებით. რაც შეეხება საფასო პოლიტიკას, ჩვენთან შემოსვლა მცირე, საშუალო და მაღალშემოსავლიან სეგმენტს შეუძლია. წლის განმავლობაში მოთხოვნა ძალიან გაიზარდა.
ჩვენ სტუმრებს ძირითადად ქართულსა და ევროპულ სამზარეულოს ვთავაზობთ, – განაცხადა ნათია ნადირაშვილმა.
კაფე „ლეღვის“ თანადამფუძნებლი ჩვენთან ქვეყანაში პროფესიონალი კადრების ნაკლებობაზე საუბრობს და აღნიშნავს, რომ ბაზარზე დიდი კონკურენციაა, თუმცა სარესტორნო ბიზნესში ცოტაა ხარისხზე ორიენტირებული.
– პროფესიონალ კადრებზე ქვეყანაში დიდი არჩევანი არ არის და ამ კუთხით თავის დროზე ძალიან ბევრი დრო დავკარგეთ. ვინც პროფესიონალია, ის უკვე მუშაობს და კონკურენციაც ამ მხრივ დიდია. ეს ჩვენთვისაც რთული იყო, თუმცა მაინც მოვახერხეთ საუკეთესო არჩევანის გაკეთება. განვითარების თვალსაზრისით ბიზნესში სირთულეები არ გვქონია.
ზოგადად, ბიზნესის წარმოების დროს არასტაბილური გარემო ხელშემშლელი ფაქტორია. წარმატება თავდაუზოგავ შრომას ნიშნავს და ამან ჩვენc შემთხვევაში გაამართლა. ბაზარზე ნამდვილად დიდი კონკურენციაა, თუმცა სარესტორნო ბიზნესში ცოტაა ხარისხზე ორიენტირებული, – განაცხადა ნათია ნადირაშვილმა.
კომერსანტი