ეკა გიგაური – „ბესელიას მხარდაჭერას ვუცხადებ, მურუსიძე-ჩინჩალაძის კლანი უნდა წავიდეს სისტემიდან“

ეკა გიგაური - „ბესელიას მხარდაჭერას ვუცხადებ, მურუსიძე-ჩინჩალაძის კლანი უნდა წავიდეს სისტემიდან“უზენაესი სასამართლოს კანდიდატების გარშემო არ ცხრება ვნებათაღელვა. საზოგადოების, პოლიტიკური სპექტრისა და სამოქალაქო სექტორის დიდი ნაწილი იუსტიციის უმაღლესი საბჭოს მიერ წარდგენილ კანდიდატებს მწვავედ აკრიტიკებს. დაძაბული ფონია მმართველ პარტიაშიც აღნიშნულ საკითხთან დაკავშირებით, რაც შესაძლოა საპარლამენტო უმრავლესობის პოლიტიკური განხეთქილებისა და გაყოფის საფუძველიც კი გახდეს.

მოსამართლეობის კანდიდატებთან დაკავშირებით „ახალ თაობასთან“ ინტერვიუში „საერთაშორისო გამჭვირვალობა – საქართველოს“ აღმასრულებელი დირექტორი ეკა გიგაური საუბრობს.

_ სასამართლო სისტემაში საკმაოდ დაძაბული ვითარებაა უზენაესის კანდიდატების გამო და ვითარება კიდევ უფრო მძიმდება „ოცნების“ შიდა დაპირისპირების ფონზე. თქვენ რას დაუკავშირებთ ამას?

_ ეს კრიზისი ლოგიკური შედეგია იმისა, თუ რა პოლიტიკას ატარებდა წლების განმავლობაში „ქართული ოცნება“. ჩვენ წლების მანძილზე ვსაუბრობდით იმაზე, რომ „ქართული ოცნების“ მიერ გადადგმული ნაბიჯები სასამართლოს რეფორმირებასთან დაკავშირებით იყო არაეფექტური. განსაკუთრებით კი ბოლო პერიოდში. ძირითადად ემსახურებოდა იმას, რომ სასამართლო სისტემაში გაძლიერებულიყო ჩინჩალაძე-მურუსიძის კლანი.

მაშინ, როდესაც ჩვენ ამაზე ვსაუბრობდით, „ოცნების“ უმრავლესობას არ ჰქონია შესაბამისი რეაგირება ამ ყველაფერზე. გვახსოვს, როგორ დაინიშნა უვადოდ სულხან მოლაშვილის მოსამართლე, როგორ დაინიშნა უვადოდ ჩინჩალაძე. ეს მხოლოდ იმის გამო მოხდა, რომ „ოცნების“ მიერ კონკრეტული კანონი იქნა შეცვლილი, რათა ეს ადამიანი დანიშნულიყო სასამართლოში. ისევე როგორც ბევრი სხვა ოდიოზური მოსამართლის დანიშვნასაც ემსახურებოდა ეს.

_ ანუ, გგონიათ, რომ დღეს რომელი დეპუტატებიც იბრძვიან – ეკა ბესელია, გედევან ფოფხაძე და ა. შ. მათი ქმედებები დაგვიანებულია?

_ რა თქმა უნდა, მმართველი პარტიის მხრიდან ნაბიჯები დროულად რომ გადადგმულიყო, შედეგად მივიღებდით ღირსეული მოსამართლეებით დაკომპლექტებულ სასამართლოს. ეს ნამდვილად ასეა.

ყოველთვის ვამბობდით, რომ მოსამართლეები, რომლებიც დღეს წარმოადგენენ კლანს, აქ დაახლოებით 15 კაცზეა საუბარი, არ უნდა იყვნენ სასამართლო სისტემაში. იმიტომ, რომ ისინი წინა ხელისუფლების დროს წინა ხელისუფლებას ემსახურებოდნენ და ზოგი მათგანი ამასთან სისხლის სამართლებრივ დანაშაულსაც ჩადიოდა.

დღეს უკვე ისინი ამ ხელისუფლებას ემსახურებიან და შემდეგი ხელისუფლება რომ მოვა, იმ ხელისუფლებას მოემსახურებიან. ამიტომ, ჩვენ როდესაც ვსაუბრობდით, რომ ისეთი კანონები არ მიეღოთ, რომ ძალაუფლება ხელში ჩაეგდო ამ კლანს, ზუსტად ამას ვამბობდით, რომ რაღაც მომენტში ისინი ისე გაძლიერდებიან, რომ კონკრეტული ინსტრუქციების მიცემასაც შეძლებდნენ უმრავლესობისთვის.

ისინი გაძლიერებულები არიან არა მხოლოდ კონკრეტული საკანონმდებლო ცვლილებებით, არამედ იმით, რომ „ქართული ოცნების“ კონკრეტული წევრები მათ უმაგრებენ ზურგს. სია, რომელიც იყო წარმოდგენილი, იყო შეთანხმებული კობახიძესთან. დაწმუნებული ვარ, რომ ეს ყველაფერი ასევე იქნებოდა შეთანხმებული ზარდიაშვილთან, მდინარაძესთან და ა. შ.

_ ეს თქვენი ვარაუდია თუ კონკრეტულ ინფორმაციას ფლობთ?

_ ზარდიაშვილს რომ მჭიდრო და კონკრეტული ურთიერთობა აქვს ჩინჩალაძესთან და მურუსიძესთან, ეს ყველასთვის ცნობილია. როგორც ხედავთ, უკვე პარლამენტის თავმჯდომარეზეც ვრცელდება ინფორმაცია.

_ კონკრეტულ ინფორმაციასაც ხომ არ ფლობთ ამასთან დაკავშირებით, რომ სია მათთან წინასწარ იყო შეთანხმებული?

_ ამაზე გედევან ფოფხაძემ გააკეთა განცხადება, რომ კომენტარები არ გაეკეთებინა ამ სიასთან დაკავშირებით. ანუ მათ იცოდნენ წინასწარ, ვინ იქნებოდნენ სიაში, აქედან გამომდინარე ვასკვნი ამას, რომ, როგორც ჩანს, მათ უკვე იცოდნენ, ვინ იქნებოდნენ სიაში და შესაბამისად სთხოვდნენ თავისი გუნდის წევრებს, რომ მათ კომენტარი არ გაეკეთებინათ.

ამიტომ ჩვენ შეიძლება ვილაპარაკოთ პროცედურების გაწერაზე და ეს ძალიან მნიშვნელოვანია, მაგრამ მე მგონი დღეს ჩვენ ყველამ ვიცით, ვინ წარმოადგენს ჩინჩალაძის და მურუსიძის კლანს. ამის შესახებ ინფორმაცია გააჩნიათ უმრავლესობის წევრებსაც, ამიტომ მათ ყველაფერი უნდა გააკეთონ, რომ ეს ხალხი არ მოხვდეს უზენაეს სასამართლოში.

აქედან გამომდინარე მე პირადად მხარდაჭერას ვუცხადებ ეკა ბესელიას. მან მოახერხა ამ პირობებში საჯაროდ დაეწყო ლაპარაკი. მიუხედავად იმისა, რომ იცოდა, მას შეხვდებოდა წინააღმდეგობა ამ პროცესში.

_ შექმნილ რთულ ვითარებაში გამოსავალი რაში მდგომარეობს?

_ იდეალური გამოსავალი არის ის, რომ ეს ხალხი წავიდეს სისტემიდან. მურუსიძე, ჩინჩალაძე, გვრიტიშვილი და მათი კლანის ყველა წარმომადგენელი, ყველა ეს ოდიოზური ფიგურა უნდა წავიდეს სასამართლო სისტემიდან. ეს ყველაზე მთავარია და ამის უზრუნველყოფა ვერ მოახერხა ხელისუფლებამ 6 წლის განმავლობაში.

მათ ეს ბერკეტები ჰქონდათ. შეეძლოთ, კანონები ისე მიეღოთ, რომ ისინი არ დანიშნულიყვნენ და, რა თქმა უნდა, ხელისუფლების წარმომადგენლებს ზურგი არ უნდა გაემაგრებინათ ამ ხალხისთვის. ის მოსამართლეები, რომლებიც ჯერ ნაციონალურ მოძრაობას ემსახურებოდნენ და დღეს „ქართულ ოცნებას“ ემსახურებიან, უნდა წავიდნენ რადგან შეუძლებელია, რომ მათ სასამართლო სისტემას რაიმე კარგი მოუტანონ. იდეალური გამოსავალი ეს იქნება.

ეს სია, რომელიც წარმოდგენილია, არის მურუსიძე-ჩინჩალაძის ჯგუფის ნაწილი, ამიტომ მნიშვნელოვანია, რომ ის ხალხი არ მოხვდეს სასამართლო სისტემაში. უზენაეს სასამართლოში მათ ისეთი გავლენები არ აქვთ, როგორიც პირველ და მეორე ინსტანციაში აქვთ. ამიტომ მნიშვნელოვანია, რომ ამ ხალხმა არ შეაღწიოს სასამართლო სისტემაში.

_ თინა ხიდაშელმა „აიპრესთან“ თქვა, რომ კოალიციაში ყოფნისას, 2015 წლის დეკემბერში მათგან მურუსიძის მხარდაჭერას პირადად ბიძინა ივანიშვილი ითხოვდა.

_ ეს ნამდვილად არ ვიცი, მაგრამ მე მახსოვს ბატონ ივანიშვილის შეხვედრა მურუსიძესთან, როდესაც ივანიშვილმა თქვა, რომ მურუსიძე იყო სისტემის მსხვერპლი. მაგრამ, მინდა გითხრათ, რომ ეს ადამიანები სისტემის მსხვერპლნი ნამდვილად არ ყოფილან, ესენი ატარებდნენ იმ პოლიტიკას, რომელიც ვერავითარ კრიტიკას ვერ უძლებდა.

არიან მოსამართლეები, რომლებიც საკუთარი თვალით ხედავდნენ ნაწამებ პატიმრებსა და ადამიანებს, მაგრამ არასდროს კითხვას არ სვამდნენ, რა დაემართათ მათ. მაგალითად, ხომ არ შეექმნათ პრობლემა პოლიციასა და პროკურატურაში.

ესენი არიან ის მოსამართლეები, რომლებიც თვალს ხუჭავდნენ ადამიანის უფლებების დარღვევებზე. არ შეიძლება მათ მორალური უფლება ჰქონდეთ, რომ დღეს ისინი მართლმსაჯულებაზე საუბრობდნენ. ამიტომ ძალიან მნიშვნელოვანია, რომ საზოგადოებას ჰქონდეს ადეკვატური რეაგირება.

_ თუ ის სცენარი არ განვითარდება რისი მოლოდინიც შესაძლოა გქონდეთ, ხომ არ მოგიწევთ სხვა ზომების მიღება. მათ შორის აქციებიც? ზაზა ხატიაშვილი ხშირად გსაყვედურობთ ხოლმე არასამთავრობოებს, რომ როცა ქუჩაში გავდიოდი, არავი მიჭერდა მხარსო.

_ ზაზა ხატიაშვილი ალბათ ჩემზე არ იტყოდა. იმიტომ, რომ მე და ზაზა ერთად ვიდექით. მახსენდება პარლამენტის თავმჯდომარის განცხადება, რომელმაც თქვა, რომ თავის დროზე როდესაც ეს მოსამართლეები ინიშნებოდნენ, სამოქალაქო სექტორის წარმომადგენლების მხრიდან ასეთი რეაქცია არ ყოფილაო.

ნამდვილად მქონდა მწვავე რეაქცია. აქციის ფოტოებიც კი მაქვს შენახული, როდესაც მართლა 20 კაცი ვიდექით იუსტიციის საბჭოს წინ, როცა მურუსიძე ინიშნებოდა სასამართლო სისტემაში. მართალია, მცირე ჯგუფი, მაგრამ მაინც ვაკრიტიკებდით. განსაკუთრებით ის ადამიანები, რომლებიც სასამართლო სისტემაში მიმდინარე ამ საშინელებას წლების განმავლობაში ვაკვირდებოდით. ნამდვილად ვიდექით და ვაკრიტიკებდით, მაგრამ საზოგადოების მხრიდან ამ თემას დიდი ყურადღება არ მოჰყოლია და ახლა უკვე ვხედავთ, რომ ამან სავალალო შედეგები მოიტანა.

მნიშვნელოვანია, რომ ყველა ჯგუფი გავერთიანდეთ და მხოლოდ არასამთავრობოები არ ვსაუბრობდეთ ამ თემებზე.

იაგო ნაცვლიშვილი, ახალი თაობა