ფიზიკური დაპირისპირება ზუგდიდში – სამართალდამცველებმა ხულიგნობის ბრალდებით სამი პირი დააკავეს.
გამოძიებამ დაადგინა, რომ „ნიკორას“ ქსელის ერთ-ერთ მაღაზიაში გამყიდველს, კონსულტანტსა და დაცვის თანამშრომელს ნასვამ მდგომარეობაში მყოფი სამი პირი დაესხა.
შემთხვევა საჯვაროს უბანში, სოხუმის ქუჩაზე 5 მარტს მოხდა. ინციდენტს წინ შელაპარაკება უძღოდა. დაპირისპირების შედეგად დაზიანდა მაღაზიის ინვენტარი და მსუბუქად დაშავდნენ თანამშრომლები, ორი მათგანი ზუგდიდის რეფერალურ საავადმყოფოში გადაიყვანეს.
შს სამინისტროს ინფორმაციით, საქმეზე გამოძიება 239-ე, ხულიგნობის მუხლით მიმდინარეობს. ბრალის დამტკიცების შემთხვევაში სამივე დაკავებულს 2-დან 5 წლამდე ვადით თავისუფლების აღკვეთა ემუქრება.
რუსთავი 2