ექიმი არჩილ ჯალაღონია მედიკოს თეონა ლორთქიფანიძის შესახებ გვიყვება:
“ჩემო ქუთაისლებო, აუცილებელია იცნობდეთ ახალგაზრდა ექიმს თეონა ლორთქიფანიძეს, რომელთანაც მქონდა ბედნიერება მემუშავა კლინიკა “ბომომდში” რამდენიმე თვე კოვიდ 19-ის ბლოკში და გავმხდარიყავი თავდაუზოგავი ბრძოლების და უძილო ღამეების მომსწრე… ამ უთანასწორო ბრძოლაში როგორ ზეიმობდა სიცოცხლე ერთმანეთის მიყოლებით…
თეონა ერთადერთი ექიმი გინეკოლოგი იყო იმ პერიოდში დასავლეთში, ვისთანაც გადმოყავდათ ყველა კოვიდ-19-ით ინფიცირებული ორსული და მეძუძური დედა… ათეულობით ორსული მიიღო, უმკურნალა, მოეფერა, ამშობიარა და შინ გამოჯანმრთელებული და გამრავლებული გაუშვა თავიანთი პატარებით…
მახსენდება ერთი სამუშაო ღამე, დაახლოებით 10-მდე ორსული უწევს. პარალელუად საოპერაციოში შედის და ამშობიარა ორი ორსული, დედებიც და ბავშვებიც კარგად არიან და… უცებ თეონა ექიმი მოწყდა და წაიქცა, მივარდნენ ექთნები, ექიმები, გაუწიეს დახმარება. მოიხედა ჩვენსკენაც და როცა დასტაბილურდა ყველაფერი, რამდენიმე წუთში შეუდგა მის საქმეს…
ვითომც არაფერი, თითქოს არაფერიც მომხდარა…თითქოს… მერე რა რომ რამდენიმე თვე კლინიკიდან არ გასულა, მერე რა რომ საკვებს არ ღებულობს ზოგჯერ მთელი დღე, მერე რა რომ ამდენი პასუხისმგებლობაა დედა და ჩვილი, მერე რა რომ კოვიდია, მერე რა რომ თვითონაც ცუდადაა, მერე რა რომ დაინფიცირდა, მერე რა რომ პნევმონია აქვს, მერე რა რომ მასაც ჰყავს ოჯახი, მერე რა რომ გამოჯანმრთელების შემდეგ კურორტის მაგივრად ისევ კლინიკაშია…
ის ყველა კოვიდ 19-ით ინფიცირებული ორსულის იმედია, ქალაქის სიამაყე და ჩემი როგორც კოლეგა მონაპოვარი…იცნობდეთ, გიყვარდეთ და გაუფრთხილდით.”