„შემდეგი კვირის ბოლომდე ჯერ კიდევ ველოდებით ინფიცირებულთა მომატებას იმ მოქალაქეთა შორის, რომლებიც შესაძლოა, იმპორტირებულ კოვიდ პაციენტებად იყვენენ ჩვენი ეპიდემიოლოგებისგან მოხსენიებული. ესენი არიან ის მოქალაქეები, რომლებიც ამ ეტაპისთვის იმყოფებიან საკარანტინო ზონებში და კარანტინში5 ათასზე მეტი მოქალაქეა“, – ამის შესახებ ჯანდაცვის მინისტრმა POSTV-ის ეთერში განაცხადა.
ეკატერინე ტიკარაძის განმარტებით, ჯერჯერობით ძირითადად საკარანტინო ზონებში მყოფი პირების შემთხვევაში ხდება კორონავირუსის დადასტურება.
„არის მოლოდინი, რომ შეიძლება მოხდეს შიდა გავრცელების გაზრდა და ვფიქრობთ, რომ ეს იქნება აპრილის ბოლოდან. უკვე პიკს ველოდებით მაისის დასაწყისში და იქნება რამდენიმე ასეული პაცეიენტი. თუ დღესდღებით ჩვენ გვაქვს მატება ათეულობით, აპრილის შუა რიცხვებიდან, თვის ბოლოდან ეს იქნება 50, ან რამდენიმე ასეული ყოველდღიურად. რა თქმა უნდა, თუ ყველა ის ღონისძიება არ ჩატარდა იმ ხარისხით და თანმიმდევრობით, როგორც უნდა ჩატარდეს“ – განაცხადა ეკატერინე ტიკარაძემ.
საქართველოში ამ დროისთვის კორონავირუსის 130 შემთხვევა დადასტურდა, მათგან 26 ადამიანი უკვე განიკურნა.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.