ოჯახი ქობულეთის მუნიციპალიტეტის სოფელ ბობოყვათში 17 წლის გოგი დოლიძის გაუჩინარებას ინტერნეტ თამაშს უკავშირებს.
როგორც „ინტერპრესნიუსს“ გაუჩინარებული ბიჭის დამ, თეონა დოლიძემ განუცხადა, მისი ძმა 7 დეკემბერს დილით სკოლაში წავიდა, „თუმცა იქამდე არ მისულა, ქალაქში ჩავიდა და მას შემდეგ არავის უნახავს“.
თეონა დოლიძის თქმით, არასრულწლოვანი ძმის გაუჩინარების შესახებ ქობულეთის პოლიციის განყოფილებას და აჭარის პროკურატურას გუშინვე შეატყობინეს.
– 7 დეკემბერს დილით სკოლაში წავიდა, თუმცა არ მისულა. სოფელ ბობოყვათში ვცხოვრობთ, სოფლის „მარშუტკას“ ქობულეთში გაყვა, იმის შემდეგ კვალი იკარგება. ტელეფონი გამორთული აქვს. პოლიცია ვერ პოულობს. ნათესავები, მეგობრები ყველა ვეძებთ, თუმცა არავის არ აქვს ინფორმაცია. წუხელ ღამით სოციალურ ქსელში მისი პოსტები დავათვალიერე და ვვარაუდობ, რომ იგი ე.წ რუსულ თამაშს „ჩორნი კიტს“ ანუ 50 მისიას თამაშობდა, რომლის მიხედვითაც, სხვადასხვა მისიას ასრულებ, ბოლო მისია კი თვითმკვლელობაა. თამაშის თანახმად, ვეშაპები იკლავენ თავს. ასევე კომპიუტერი ლურჯი ვეშაპის ფოტოებით აქვს დატვირთული. მინახავს ისიც, რომ დაუხატავს ლურჯი ვეშაპი. ხელები დაკაწრული ჰქონდა, რის გამოც ვეჩხუბე, ის კი იცონოდა. ერთხელ რუსულად ასეთი პოსტიც დაწერა: „შავი ვეშაპი არ არის უბრალოდ თამაში, ეს სიკვდილი ან სიცოცხლეა, მაპატიეთ ყველამ“. ბოლო პოსტზე უწერია, „დრო მოვა, არა და დრო მიდისო“.
ერთი თვის წინ რომ ვნახე, ოთახიდან არ გამოდიოდა, საშინელებებს უყურებდა. ვუთხარი, რომ ეს მის ფსიქიკაზე აისახებოდა. ბოლო ფოტო აქვს გადაღებული გზაზე, სადაც ისრის მიმართულება მარცხნივ ინგლისურად მიუთითებს წარწერაზე „ენდ“, რაც დასასრულს ნიშნავს. მე ყველაფერს ამ თამაშთან ვაკავშირებ. საკუთარი თავის დაზიანება, ისეთი პოსტები აქვს დაწერილი, სწორედ ამ თამაშს ვუკავშირებ. 6 დეკემბერს ვესაუბრე, სახე ძალიან დაკაწრული ჰქონდა, – აცხადებს გაუჩინარებული ბიჭის და.
– 7 დეკემბერს დილის ცხრა საათზე გავიდა სახლიდან სკოლაში და გაუჩინარდა. მას შემდეგ ყველგან ვეძებთ. პოლიციამ დაადგინა, რომ მისი ტელეფონი იმავე დღეს, სამ საათზე ქობულეთის ავტოსადგურთან გაითიშა. ვეჭვობ, ინტერნეტთამაშებს შეიძლება უკავშირდებოდეს. “ლურჯი ვეშაპის” ფოტო ვნახეთ მის კომპიუტერში, ჰქონია საეჭვო სტატუსებიც, თუმცა დანამდვილებით არაფრის თქმა არ შემიძლია, – ამბობს მოზარდის მამა ზორბეგ დოლიძე.
საქართველოს შინაგან საქმეთა სამინისტროს ინფორმაციით, ქობულეთში 17 წლის მოზარდის გაუჩინარებასთან დაკავშირებით სამძებრო სამუშაოები მიმდინარეობს.