ტყიბულში, მინდელის მაღაროს ყოფილი თანამშრომელი ამბობს, რომ 5 აპრილს, სავარაუდოდ, უბედური შემთხვევა მოხდა.
ამის შესახებ პაატა ქურციკიძემ “პრაიმტაიმს” განუცხადა.
პაატა ქურციკიძე იმ შემთხვევას იხსენებს, როდესაც მსგავსი აფეთქების დროს, ხელმძღვანელობა მეშახტეს ხელფასის დაკლებით დაემუქრა.
– ადრე იყო ასეთი შემთხვევა, რომ ეშინოდა შესვლა ერთ-ერთ მეშახტეს აფეთქებისას და ამბობდა, რომ საშიშია ვერ შევალ, დავაცადოთ, ვერ გავბურღავო, ხელმძღვანელობა ამბობდა, თუ ეშინია და ვერ შევა, 300 ლარიან ხელფასზე გადმოვიყვანო. ეს უთხრეს ერთ-ერთ პიროვნებას, სახელს ვერ დავასახელებ. მე 4 კილო ნახშირისთვის გამომაგდეს და თვითონ ხალხს კლავენ და ასეთ მდგომარეობაში აყენებენ. მათთვის მთავარია, ნახშირი მიიღონ, ადამიანების ჯანმრთელობა არ აინტერესებთ, – აცხადებს ყოფილი მეშახტე.
მისი თქმით, ამჟამად მეშახტეების ანაზღაურება 900-1.000 ლარია.
ამ დროისთვის არსებული ინფორმაციით, შემთხვევას 6 ადამიანის სიცოცხლე ემსხვერპლა, ხოლო დაშავდა 3 მეშახტე. ორ მათგანს გამოკვლევები და შესაბამისი მკურნალობა ქუთაისის ინტერვენციული მედიცინის ცენტრში უტარდება, ხოლო ერთს – ტყიბულის კლინიკაში.
პრაიმტაიმი