იაგო ნაცვლიშვილი, ახალი თაობა
არის თუ არა ოპოზიციურ სპექტრში თანამშრომლობაზე მზაობა საარჩევნო სისტემის გარდა სხვა საკითხებზეც და როგორ წარმოუდგენია ნინო ბურჯანაძესთან ერთად ერთ ფორმატში მუშაობა? _ ამ და სხვა საინტერესო საკითხებზე „ახალ თაობასთან“ ინტერვიუში პარტია „კანონი და სამართალის“ ლიდერი თაკო ჩარკვიანი საუბრობს.
_ ოპოზიცია აგრძელებთ ერთიან ფორმატში მუშაობას?
_ დიახ, ერთად ვართ. სიმართლე გითხრათ, არ იყო მარტივი. მე როდესაც გრიგოლ ვაშაძე წარვადგინე პრეზიდენტობის კანდიდატად გასულ წელს, მაშინაც რთული იყო, მაგრამ ის გაერთიანება იყო აბსოლუტურად პროდასავლური და მაშინ ის გაერთიანება ნაკლებ სირთულეს წარმოადგენდა. ახლა კი ბევრად უფრო რთული იყო. იმიტომ, რომ ჩემთვის რუსული ვექტორი წყალგამყოფია.
_ ეს კითხვა მაქვს ზუსტად. წავიკითხე სოციალურ ქსელში თქვენი პოსტი, სადაც ამბობთ, რომ ლამის არის უკვე „ბელა ჩაოს“ მღერა დაიწყოთ. ცხადია აქ ბურჯანაძეზე მიანიშნებდით.
_ კი ბატონო. მე ანგარიშვალდებული ვარ ჩვენი პარტიის „კანონი და სამართალის“ ამომრჩეველთან და წევრებთან. ახალგაზრდები მყავს პარტიაში და მათთვისაც კატეგორიულად მიუღებელია რუსული ვექტორი. მით უმეტეს ის პოლიტიკოსები, რომლებიც პოლიტიკაში ძალიან გაცვეთილი და გამოკვეთილები არიან რუსული ორიენტაციის მხრივ და არ მალავენ ოკუპანტის მიმართ მხარდაჭერას.
_ ამ შემთხვევაში ბურჯანაძეს გულისხმობთ?
_ რა თქმა უნდა. მე არ ვსაუბრობ შეურაცხმყოფელი ენით, არამედ მე ვსაუბრობ იმ რეალობაზე, რაც გაცხადებული აქვს მას და ამიტომ ვამბობ მას.
ბატონმა შალვა ნათელაშვილმა შეგვატყობინა ერთიანი ფორმატის თაობაზე, ვილაპარაკეთ ყველამ, რა ვქნათო. მე სანამ გადაწყვეტილებას მივიღებდი, დაველაპარაკე პარტიაში და ასე მივიღეთ გადაწყვეტილება. ჩემმა თანაპარტიელებმა ეს კითხვები რუსული ორიენტაციის კონტექსტში დამისვეს, რომ უნდა გადაგვედგა თუ არა ეს ნაბიჯი. მაგრამ ეს გადაწყვეტილება მაინც მივიღეთ. ვინაიდან სრულად ოპოზიციურმა სპექტრმა გადაწყვიტა, რომ დაეწყო კამპანია ყველა მინუს ერთი.
აქვე მინდა ხაზგასმით ვთქვა, რომ ეს არის მხოლოდ და მხოლოდ დროებითი. ნინომ არ იფიქროს, რომ სამომავლოდ ერთად ვიქნებით, ეს გამორიცხულია. მხოლოდ ახლა ამ უზურპატორი ივანიშვილის წინააღმდეგ გავერთიანდით.
ივანიშვილმა „გადაგვაგდო“ ყველა, როდესაც პროპორციულ სისტემაზე გადასვლის ინიციატივა ჩააგდო. ამის გამო ხალხი არის შეურაცხყოფილი და მხოლოდ და მხოლოდ ამ თემის ირგვლივ გავერთიანდით.
ბავშვები 2-3 თვე იდგნენ რუსთაველზე, მანამდე გაერთიანებულ ოპოზიციას შეტანილი ჰქონდა 200.000-ზე მეტი ხელმოწერით და ივანიშვილმა მსოფლიოს წინაშე დადო პირობა, რომ საარჩევნო სისტემას შეცვლიდა და უცებ ყველა „გადაგვაგდო“.
ეს იყო პატრონ-ყმური წყობის, ვიღაცა ფეოდალის კაპრიზები. ეს არის ქართული სახელმწიფოებრიობის არნახული სირცხვილი. როდესაც ხალხს კადრებ, რომ ასე ათამაშო, ეს არის საშინელება და ღირსების აყრა. ამიტომ წავედით ამაზე. ეს ჩემთვის არ იყო მარტივი და ალბათ სხვებისთვისაც არ იყო იოლი, მაგრამ მოვახერხეთ და დავსხედით საერთო მაგიდასთან და ვმოქმედებთ ერთიან ფორმატში, მხოლოდ ამ ნაწილში.
_ ვიყოთ ობიექტურები და ვთქვათ, რომ რამდენიმე თვის წინაც იჯდა ბურჯანაძე ოპოზიციასთან ერთად. მაშინ, როდესაც ამ საკითხებზე მიდიოდა მუშაობა საარჩევნო კანონმდებლობასთან დაკავშირებით. ვგულისხმობ 20 ივნისამდე არსებულ ვითარებას.
_ მე იმ შეხვედრებზე არცერთხელ არ მივსულვარ.
_ ამის გამო არ მიდიოდით?
_ დიახ. ერთ შეკრებაზეც კი არ ვყოფილვარ, მაშინ როდესაც პროპორციულის საკითხებზე ოპოზიცია ერთობლივად მუშაობდა. მე მაქვს ჩემი პრინციპები და ამის გამო არ მივდიოდი იმ შეკრებაზე. ახლა სხვა ვითარება შეიქმნა. ხელისუფლებამ უცბად „გადააგდო“ ხალხი. მე ასეთი რაღაცა არ გამიგია.
_ ამბობთ, რომ მხოლოდ საარჩევნო საკითხებზე მუშაობთ ერთად, მაგრამ ასეთმა ვერსიამაც გაიჟღერა, რომ არჩევნებისთვის ოპოზიცია შესაძლოა შეთანხმდეს საერთო კანდიდატებზე. ამისთვის მზად ხართ?
_ არ არის ეს მართალი, აბსოლუტურად ჭორებია. ასეთი საკითხი არც კი განხილულა.
_ როგორ არის ჭორები, როდესაც ცოტა ხნის წინ პირადად მე დამიდასტურა კოტე კემულარიამ, რომ ამის მზაობა არსებობს.
_ არ ვიცი. ჩემ გარეშე რაზე ისაუბრეს, არ ვიცი. ჩემი მონაწილეობით ასეთი საუბარი არ ყოფილა, თუმცა ვერც იმას ვიტყვი, რომ ბატონი კოტე არასწორს ამბობს.
_ თუ დადგება ასეთი საკითხი, რომ საერთო კანდიდატები უნდა დაასახელოთ, რადგან ეს არის გზა ივანიშვილის დასამარცხებლად, დათმობაზე წახვალთ?
_ არა, საკითხი ასე არ დადგება. პირდაპირ გეუბნებით ამას. ჩვენ ვითხოვთ პროპორციულ სისტემას და ვადამდელ არჩევნებს, ამიტომ ეს საკითხი არ დადგება.
_ კი მაგრამ, ე. წ. გერმანულ მოდელზე საუბრობთ და პროპორციულს როგორ ითხოვთ?
_ გერმანულ მოდელზე არ ვლაპარაკობ ამ შემთხვევაში, მაგრამ ახლა ამ წამს ივანიშვილთან დიალოგზე წასვლა ისეთი სირცხვილი და უხერხულობაა, რომ რა ვიცი. რაზე უნდა იყოს დიალოგი?! ახლა შენ მე რომ გადამაგდე უკან დამიბრუნე და მე შენ დაგიწყებ ვაჭრობას?! ეს ხომ სირცხვილია?! პირიქით უნდა უთხრა, რომ შენ, ფეოდალო თავხედო ხალხს ამას როგორ უბედავ?!
_ გამოსავალი რა არის? უნდა წავიდეს?
_ დიახ, აი ეგ არის გამოსავალი. საჭიროა დიდი რაოდენობის ხალხი და თუ გაამწვავებს სიტუაციას, მერე ჩვენ იქ ვიტყვით: კარვები, პიკეტირება, ღამის თენება… აბა როგორ?! ეს კაცი რეებს კადრულობს და არ გავათავისუფლოთ ჩვენი ქვეყანა?!
_ ანუ, თქვენ ემხრობით რევოლუციურ გზას?
_ კონსტიტუციის დაცვის უფლება არანაირად არ გულისხმობს აჯანყებას.
_ ჩემს კითხვაში ხავერდოვანი რევოლუცია ვიგულისხმე. აჯანყება არც დამიშვია.
_ აბსოლუტურად. ჩვენი უფლებაა, დავიცვათ ჩვენი საზოგადოების უფლებები კონსტიტუციის შესაბამისად. ჩვენთვის ეს არავის არ აუკრძალავს და ეს არანაირად არ არის რევოლუცია. როდესაც მოქალაქეს ართმევენ უფლებას, ის იცავს კონსტიტუციით მინიჭებულ უფლებას. ამიტომ, ამას ვერ დაარქმევ პარტიების კაპრიზს.
მარტო ჩვენ ხომ არ ვართ ამ მდგომარეობაში, ხალხი აღშფოთებულია. ამიტომ, გადავწყვიტეთ და ამ ფორმატში დავსხედით. დანარჩენზე ლაპარაკი არ არის. ამაზე მეტზე თუ იქნება ლაპარაკი, მე ნამდვილად არ ვაპირებ სამომავლოდ რუსული ვექტორის პარტიებთან რაიმეზე საუბარს, ეს ჩემთვის და ჩემი პარტიის თითოეული წევრისთვის სასიცოცხლოდ მნიშვნელოვანია. მე არ ვაკონკრეტებ გვარებს, ვისაც რუსული ვექტორი აქვს გაცხადებული, მათთან გამოვრიცხავ ასეთ ურთიერთობას.
დღევანდელი მუშაობა უკავშირდება არჩევანის თავისუფლებას, რისი უფლებაც ნებისმიერ პარტიას აქვს და შესაბამისად ვერ ვიტყვი მათზე, რატომ იბრძვის კონსტიტუციური უფლების დასაცავად-მეთქი. ამიტომ, ჩავთვალე, რომ თუ სახელმწიფოებრიობას ეს სჭირდება იმ ვითარებაში, როცა ფეოდალმა ივანიშვილმა სახელმწიფო ღირსება აგვყარა, ამიტომ დავთანხმდი ერთობლივ მუშაობას ამ კონკრეტულ საკითხზე. რომ გითხრათ იოლი იყო-მეთქი, იოლი ნამდვილად არ იყო.
_ ინტერვიუს ბოლოს შეაფასეთ ვითარება, რაც ხდება ოკუპანტების მხრიდან ექიმ ვაჟა გაფრინდაშვილის დაკავებასთან დაკავშირებით. ხომ არ დაინახეთ ხელისუფლების მორიგი უმოქმედობა ამ საკითხზე?
_ ბატონი ვაჟა არის ვაჟკაცი. რა თქმა უნდა, ხელისუფლება სრულად უუნაროა. სახელმწიფო აღარ გვაქვს. ნორმალური სახელმწიფო და ნებისმიერი ხელისუფლება ამაყობს გმირებით, მაგრამ ამათ გმირები ეზიზღებათ. გმირების ფონზე მკაფიოდ ჩანს, რომ თვითონ არიან დაბალი სულის პატრონები და მშიშრები. რა თქმა უნდა, ამიტომ არიან უმოქმედო.
ვაჟა გაფრინდაშვილი არცერთი პარტიის წევრი არ არის, არასდროს პოლიტიკაში არ ჩართულა და უცბად აღმოჩნდა, რომ გმირია. საოკუპაციო ზოლთან მივიდა ეს ვაჟკაცი კაცი, რომ გადააბიჯა, უთხრეს, რომ შენ საზღვარი დაარღვიეო და თქვა, რომ ჩემს ქვეყანაში ვიმყოფებიო. უცბად აღმოჩნდა, რომ ეს კაცი გმირია. სახელმწიფოში, სადაც გმირის პატივისცემა არ იციან, ვეტერანების პატივისცემა არ იციან და 22 ლარიან პენსიაზე ჰყავთ, სადაც პენსიონერების პატივისცემა არ იციან, სხვა რაზე უნდა ვილაპარაკოთ?!
ეს იცით, რისი ბრალია? _ აგვისტოს ომის დროს ჩვენმა გმირმა ბიჭებმა გმირობები რომ ჩაიდინეს და ჩვენ ხელისუფლებას იმის ნაცვლად რომ ეთქვათ, რა მაგარი ბიჭები გვყავსო, ლაპარაკი დაიწყეს, ომი საქართველომ დაიწყოო.
აი, ეს არის არასახელმწიფოებრიობა. ამიტომ ვარ ოპოზიციაში ივანიშვილის წინააღმდეგ. უპირველესი, რის გამოც ივანიშვილის ოპოზიციაში წავედი, ის არის, რომ სახელმწიფო აღარ გვაქვს. ჯერ ჩემი სახელმწიფო გაანადგურა და მერე ნაგლეჯ-ნაგლეჯ სამთავრობოებად მიიტაცა, როგორც უზურპატორმა.
ამიტომ, ახლა ბრძოლაა საჭირო, ბრძოლა ჩაყოლამდე.