იაგო ნაცვლიშვილი, ახალი თაობა
თაკო ჩარკვიანმა და მისმა პარტიამ „კანონი და სამართალმა“ პროპორციული საარჩევნო სისტემის ირგვლივ გაერთიანებული ოპოზიციის მოლაპარაკებათა ფორმატი დატოვა. მიზეზად კი ნინო ბურჯანაძის მოსკოვში ვიზიტი დაასახელა, რაც თაკო ჩარკვიანისთვის არსებულ პოლიტიკურ მოცემულობაში მიუღებელი აღმოჩნდა.
რატომ მიიღო ეს გადაწყვეტილება, მაშინ როდესაც ნინო ბურჯანაძის პოლიტიკური ორიენტაცია ისედაც ყველასთვის ცნობილი იყო და ითანამშრომლებს თუ არა ოპოზიციურ პარტიებთან ამ საკითხების ირგვლივ და რა ფორმატში? – ამ და სხვა საკითხებზე „ახალ თაობასთან“ ინტერვიუში თაკო ჩარკვიანი საუბრობს:
_ სრულად ოპოზიციური მოლაპარაკებების ფორმატი დატოვეთ. მხოლოდ იმით არის თქვენი გადაწყვეტილება განპირობებული, რომ ნინო ბურჯანაძე წავიდა მოსკოვში?
_ თქვენი მკითხველისთვის განვმარტავ, რომ მე არ დამიტოვებია გაერთიანებული ოპოზიცია „ძალა ერთობაშია“. მე დავტოვე ოპოზიციის გაფართოებული ფორმატი, რომელიც მხოლოდ პროპორციულ საარჩევნო სისტემას ეხებოდა. კოალიციის „ძალა ერთობაშია“ წევრი როგორც ვიყავი პარტიით „კანონი და სამართლით“, ისევ ისე ვარ.
მერე გაკეთდა სრული ოპოზიციური სპექტრის ფორმატი საარჩევნო მოდელზე, სადაც ყველა ვექტორი, როგორც რუსეთის, ისე პროდასავლური მიმართულებების ფორმატი ერთად ვისხედით. ვიცი, რომ ზოგიერთს ეწყინა კიდეც ჩემი განცხადება, მაგრამ ნაკლებად ვფიქრობ ხოლმე ამაზე. მე ვთქვი მათ შორის თქვენთან ინტერვიუშიც და ინგა გრიგოლიას ეთერშიც ვთქვი, რომ ძალიან გამიჭირდა ამ ერთობაში ჩართვა, რადგან რუსული ვექტორი ჩემთვის ყოველთვის წყალგამყოფია. მაგრამ, ყველა ვექტორს აქვს უფლება, მოითხოვოს ჯანმრთელი პროპორციული სისტემა და გარემო და მე რა უფლება მაქვს ეს ვინმეს ავუკრძალო?!
ძალიან საინტერესოდ ვიმუშავეთ, კონსტიტუციონალისტები იყვნენ მოწვეულები და გაკეთდა „გერმანული მოდელი“. განსაკუთრებული მუშაობა გასწიეს ბატონმა ვახტანგ ხმალაძემ და გიორგი ვაშაძემ. წარვადგინეთ ეს მოდელი და უპრეცენდენტო მხარდაჭერა გვაქვს ოპოზიციას, იქნება ეს დასავლეთის პრესა თუ დიპლომატიური კორპუსი.
_ თვითონ ბურჯანაძე ამ პროექტის მომზადებაში აქტიურად ჩართული არ ყოფილა?
_ აბსოლუტურად ყველა ვიყავით ჩართული. 30 პარტიის ხელის მოწერაა. მათ შორის ნინო ბურჯანაძისაც.
_ იმას ვგულისხმობ, რომ ბურჯანაძეც იურისტია და მაგ თვალსაზრისით არ ყოფილა ჩართული დოკუმენტზე მომზადების პროცესში?
_ შეიძლება ითქვას, რომ ეს დოკუმენტი გაკეთებულია ხმალაძე-ვაშაძის მიერ და რა თქმა უნდა ყველამ მივიღეთ მონაწილეობა დოკუმენტის მომზადებაში. თუმცა, განსაკუთრებით გიორგი ვაშაძემ და ვახტანგ ხმალაძემ.
_ წინა ინტერვიუში მითხარით, რომ რთული იყო თქვენთვის ამ ფორმატში ჩართვა, მაგრამ ოპოზიციის ინტერესებიდან გამოხვედით. დღეს რა შეიცვალა, მაშინ როცა ყოველთვის იცოდით ბურჯანაძის პარტიის მიმართულება?
_ ეს ყველაფერი გავაკეთეთ, მოვაწერეთ ხელი და კანონპროექტის ინიცირებამდე მივედით. მაგრამ, შევხედოთ პროცესს. როდესაც ხელისუფლებასთან მივდიოდით მოლაპარაკებებზე ქართულმა ოცნებამ მოითხოვა, ვინ იჯდებოდა მეორე მხარეს. გადაწყვიტეს, რომ უნდა ყოფილიყვნენ პარლამენტის ყოფილი თავმჯდომარეები, ხმა არავის არ ამოგვიღია. გვინდოდა, რომ ეს შეხვედრა შემდგარიყო, ამიტომ არავის არაფერი არ გვითქვამს.
_ ეს იყო „ოცნების“ მოთხოვნა თუ დიპლომატების?
_ არა, დიპლომატები არ ერევიან ამაში. დიპლომატიური კორპუსი პროტოკოლით არასდროს არ მოითხოვს, ვინ სად დაჯდეს. ისინი იყვნენ მედიატორები ამ დიალოგის.
_ ფორმატი შეადგინა ქართულმა ოცნებამ და არა დიპლომატებმა?
_ რა თქმა უნდა. ეს მოთხოვნა იყო „ოცნებიდან“. ამაზე ხმა არავის არ ამოგვიღია, მაგრამ ჩვენი დამუშავებული პროექტი მივიდა იქ და მოისმინეს ყველაფერი. მთელი ამბავი ის არის, რომ ივანიშვილის დისკრედიტირება მოხდა იმ თვალსაზრისით, რომ ის ყველაფერზე ამბობს უარს.
ახლა რაც შეეხება იმას, როგორ გავიგე ბურჯანაძის ვიზიტის შესახებ. ვზივარ პირდაპირ ეთერში ამ დროს ამას მატყობინებს ერთ-ერთი ჟურნალისტი შეტყობინების სახით. ამ დროს ჩვენივე საკონსულტაციო ჩათში ჩავიხედე და ვხედავ, რომ კითხულობენ ოპოზიციის წევრები, რომ ეს მართალი იყო თუ არა. ანუ, ჩვენ იმ მაგიდასთან მსხდომებმა არ ვიცოდით. ალბათ მეტყვით, რომ იმ ფორმატთან დაკავშირებით ამას რა მნიშვნელობა აქვსო. დიდი მნიშვნელობა აქვს.
_ გიგლა ბარამიძე ამბობს, რომ რამდენიმე ლიდერმა იცოდაო და ეს სიმართლე არ არის?
_ მე შენახული მაქვს ჩათის ის ნაწილი, სადაც ლიდერები ამბობენ, რომ არ ვიცოდით, მაგრამ არა უშავსო. პაატა დავითაიამ თქვა ვიცოდიო. კოორდინატორმა თქვა მე ვიცოდიო, თუ მან იცოდა ჩვენც უნდა გვცოდნოდა. მე რომ მცოდნოდა, აუცილებლად ვეტყოდი: „თქვენ ყოველთვის დადიხართ მოსკოვში, მაგრამ ახლა უპრეცენდენტო მხარდაჭერა აქვს საქართველოს დასავლეთიდან და ახლა არ წახვიდეთ“. როდესაც ჩვენ ზარებს ვრეკავთ დასავლეთში და ყველაფერს ვაკეთებთ ამ მხარდაჭერისთვის, მაგრამ ამ დროს პრორუსული პარტიების ბროწიალს არაფერი არ მოაქვს საქართველოსთვის. როგორც ბიძინა ივანიშვილი დააბროწიალებს ხეებს, ისე დაბროწიალებენ ესენი რუსეთში. მითხარით რა ზიანი შეიძლება მოუტანოს ამან ქართულ პოლიტიკას.
_ არ ვიცი. თქვენ მითხარით.
_ ჯერჯერობით პროცესი ასეა, რომ ახალგაზრდები იბრძვიან და ერთი ახალგაზრდის ჩასმა ვერ მოხერხდა დელეგაციაში. ბავშვები, რომლებიც 20 ივნისიდან იბრძვიან, მათგან ერთი ადამიანის ჩასმა ვერ მოხერხდა ფორმატში, რომელიც ხელისუფლებასთან მოლაპარაკების დროს შედგა. როდესაც დავინახეთ, რომ არ მოდიოდნენ ამაზე ხელისუფლების წარმომადგენლები, ხმა არ ამოგვიღია, რათა არ ჩაშლილიყო. ამით დაინახა დასავლეთმა, რომ ივანიშვილი დათმობაზე კვლავ არ მოდის და მოხდა ივანიშვილის დისკრედიტირება.
_ თემას დავუბრუნდეთ. გრიგოლ ვაშაძე, რომელსაც დიდ პატივს სცემთ ამბობს, რომ ეს ფორმატი შექმნილია ჯანსაღი პროცესისთვის და მერე ვინ სად წავა და რამდენ ხმას აიღებს ხალხი გადაწყვეტსო.
_ კი, მაგრამ პოლიტიკაში არსებობს დრო. ეს არ ნიშნავს, რომ დავაბნიოთ დასავლეთი, რომელსაც ერთი ხელით თხოვნით მივმართავთ, რომ გვავიწროებს ოლიგარქი და რუსეთი. რაღა მაინცდამაინც ამ დროს წავიდა რუსეთში.
ეს უკვე განულებული, დაბალი პროცენტის მხარდაჭერილი პარტია და საკმაოდ შერყეული რეპუტაციის მქონე ლიდერმა როგორც კი რაღაცა გაერთიანება დაინახა, ჩაცუნცულდა იმ წუთში რუსეთში, რომ ეთქვა, რომ ნახეთ მე შევკარი ეს გაერთიანებაო. ცხადია, ეს მას არ გაუკეთებია. ამაში დიდი წვლილი მიუძღვის შალვა ნათელაშვილს, რომელსაც მადლობას ვეუბნები.
მიდის იქ იმიტომ, რომ პუტინს უთხრას, რომ ჩემი რეაბილიტაცია მოხდა და ისევ კარგად ვარო და ამით კიდევ ფული შემოიტყორცნოს რუსეთიდან ქვეყნის სახელმწიფოებრიობის წინააღმდეგ. ეს უნდა დასრულდეს, თორემ საქართველოს არაფერი ეშველება. მხოლოდ სიმართლე გადაარჩენს ჩვენს პოლიტიკას. როდემდე უნდა აიტანოს ყალბი პოლიტიკოსები ხალხმა?! მე ასე ვთვლი, რომ მე როგორც ერთი მოქალაქე არ შევუწყობ ხელს რუსული პარტიების რეაბილიტაციას. იმიტომ, რომ ისინი შემოიტანენ რუსულ ფულს და შემდეგ არჩევნებში კვლავ საქართველოს წინააღმდეგ ჩაირეცხება რუსული ფული. ჩემს ქვეყანაში შარვლიანი იქნება პუტინი თუ კაბიანი, ამას მნიშვნელობა არ აქვს. ეს არის დაღუპვა. ამიტომ, მოვიწვიეთ პოლიტსაბჭო პარტიაში და ვთქვით, რომ არ ვემიჯნებით პროცესს, პიკეტირება, ქუჩის აქციებში და ყველა მოთხოვნაში ვრჩებით. ისევე როგორც ჩვენი პარტიის ხელმოწერა ძალაში რჩება, მაგრამ მოლაპარაკების მაგიდასთან არ დავჯდები. პუტინის ანგარიშის ჩამბარებელთან მე მოწმედ არ დავჯდები. ეს არის ჩემი პრინციპული გადაწყვეტილება.
_ საინტერესოა ისიც, ამ ფორმატში ყოფნისას ბურჯანაძესთან სხვადასხვა თემებზე პირისპირ არ გისაუბრიათ?
_ არანაირად. ვცდილობდი, რომ არ მესაუბრა. გამარჯობა, გაგიმარჯოს. ყველასთან ვსაუბრობდი მის გარდა. დიახ, მასთან დისტანციას ვიკავებდი.
_ ხომ არ გგონიათ, რომ ეს გააჩენს ბზარს ოპოზიციის საერთო ფორმატში? ან ამის განცდას წარმოშობს საზოგადოებაში? ჯერ ბურჯანაძის ვიზიტი მერე თქვენი გადაწყვეტილება ფორმატთან დაკავშირებით. რას იტყვით ამაზე?
_ პირიქით. დასავლეთის ამომრჩეველი გააკეთებს სწორ დასკვნებს. პირიქით გაჩნდა იმედი იმისა, რომ არიან ადამიანები, რომლებიც ღირებულებებით არ თამაშობენ. ეს თამაში ჩემგან გამორიცხულია, მე არ ვარ პოლიტიკიდან პოლიტიკაში. მე ვარ ოჯახიდან პოლიტიკაში. ბურჯანაძისნაირმა ტიპებმა საქართველო შეაჩვიეს იმას, რომ პოლიტიკა ბინძურია. რაში სჭირდება ტყუილი ქართველ ხალხს და ჩვენს პოლიტიკას. სად დარბიან?! ისევ შიმშილს სთავაზობენ ამ ხალხს. აბა რუსეთს თვითონ რა დღეში ჰყავს თავისი მოქალაქეები. მე გულწრფელად მინდა, რომ მოხუცს პენსია ჰქონდეს, ბავშვები მშივრები არ იყვნენ და ადამიანებს ნორმალური ცხოვრების პირობები. რატომ დაჰქრიან ეს პატარა პარტიები პუტინის ადმინისტრაციაში?! მე განულებული პოლიტიკანის რეაბილიტაციას ხელს არ შევუწყობ.
6 თვის წინ რუსეთის ტელევიზიაში ჩემს ქვეყანას აბეზღებს რაღაცაში და 6 თვეში გაკეთილშობილდა?! ამას ვენდო, რომ ჩვენი გეგმები მიუცუნცულოს პუტინს?! ღია ეთერში აბეზრებდა საქართველოს და ახლა არ დააბეზღებდა?! ეს ღუპავს პოლიტიკურ პროცესს საქართველოში.
მე ძალიან მიყვარს ჩემი კოლეგები, პატივს ვცემ მათ გადაწყვეტილებას, მაგრამ ასეთი ქმედებისთვის რეაქცია უნდა მიმეცა, თან ამ პროცესში. ჩვენ უნდა დავანახოთ დასავლეთს, რომ ჩვენს მომავალს მათთან ერთად ვხედავთ და ეს უნდა დავამტკიცოთ საქმის. მათ უნდა დაინახონ, რომ ჩვენ ერთმნიშვნელოვნად გზა დასავლეთისკენ გვაქვს.