იაგო ნაცვლიშვილი, ახალი თაობა
გასულ კვირას თეოლოგ გოჩა ბარნოვს უცნობი პირი თავს დაესხა, ფიზიკური შეურაცხყოფა მიაყენა და მოსთხოვა, საპატრიარქოზე კრიტიკული განცხადებები აღარ გააკეთოს. შემთხვევა „ტვ პირველთან“ ინტერვიუს შემდეგ მოხდა. თეოლოგმა განცხადება პოლიციაში შეიტანა. იქამდე კი ის მწვავედ აკრიტიკებდა საპატრიარქოს იმის გამო, რომ ის არ ხურავდა ტაძრებს მრევლისთვის და არ მოახდინა ამით ვირუსის გავრცელების პრევენცია.
რა მოხდა ინციდენტის დროს? რატომ ფიქრობს, რომ საპატრიარქოდან მიუგზავნეს უცნობი პირი, რა ინფორმაციას ფლობს საპატრიარქოს შიგნით ბრძოლებზე და ვინ მართავს დღეს პროცესებს, რეალურად რა გავლენა აქვს პატრიარქს და მართავს თუ არა პროცესებს უშუალოდ ილია მეორე? – ამ და სხვა საინტერესო საკითხებზე „ახალ თაობასთან“ ინტერვიუში თეოლოგი გოჩა ბარნოვი საუბრობს.
_ მოუყევით ჩვენს მკითხველს, რა მოხდა?
_ გასული კვირის სამშაბათ საღამოს მე მქონდა ინტერვიუ „ტვ პირველთან“ და ინტერვიუს მსვლელობისას უცნობი პირი ამოვარდა პარკში, როდესაც ინტერვიუს ვაძლევდი და ვსაუბრობდი, მაგრამ მეორე პირმა, მისმა ახლობელმა გაათრია და მაშინ არაფერი მომხდარა. როდესაც დავასრულე ინტერვიუ და ჟურნალისტს ველაპარაკებოდი, მოვარდა მეორედ, ამჯერად უკვე მარტო. ჯერ ოპერატორისკენ გაიწია და შემდეგ წამოვიდა ჩემკენ. მომმართა კითხვებით, თუ ვინ ვიყავი, რატომ ვაძლევდი ინტერვიუს და რატომ ვსაუბრობდი საპატრიარქოს მისამართით კრიტიკული ტონით. მან მითხრა, რომ მე აღარ უნდა მიმეცა ინტერვიუ.
მე ვკითხე, თქვენ ვინ ხართ-მეთქი და ეს რომ ვუთხარი, ამის შემდეგ დამარტყა სახეში, სათვალე მომძვრა. სანამ დავიხარე და სათვალე ავიღე, მანამ უკვე გაყვანილი ჰყავდათ. ეტყობა, მისი ახლობლები მოვარდნენ და გაიყვანეს. ამის მერე აღარ მინახავს. ერთი დღე ვაცადე, ველოდი, რომ მოვიდოდა და დამელაპარაკებოდა. მე ნამდვილად არ მინდოდა პოლიციაში განცხადების გაკეთება, მაგრამ მე მივხვდი, რომ ეს იყო მოგზავნილი „ტიტუშკა“, თორემ უბრალო გამვლელს რაში აინტერესებს, რა ინტერვიუს აძლევს გოჩა ბარნოვი ტელევიზიას?!
ეს იყო „ტვ პირველთან“ დაკავშირებული საქმეც და მე რომ არ განმეცხადებინა პოლიციაში, შესაძლოა ბრალი დანაშაულის დაფარვისთვის წაეყენებინათ ჩემთვის, ამიტომ განვაცხადე პოლიციაში. ჩემს ადვოკატთან ერთად ვიყავით მისული პოლიციის სამმართველოში.
_ ეს ინციდენტი კადრებშიც არის დაფიქსირებული?
_ არა, კადრებში არ ჩანს. იმიტომ, რომ ოპერატორს კამერა უკვე გამორთული ჰქონდა.
_ მოწმეები გყავთ ალბათ, რომ შემთხვევა მოხდა. ასეა?
_ კი, „ტვ პირველის“ ჟურნალისტები – ჟურნალისტი, ოპერატორი და მძღოლი.
_ თავდამსხმელი ითხოვდა, რომ საპატრიარქოზე კრიტიკული განცხადება არ გაგეკეთებინათ?
_ დიახ. ითხოვდნენ, რომ უნდა შემეჩერებინა ეს და ინტერვიუები აღარ უნდა მიმეცა. ცალსახად ჩანს, რომ ეს მოგზავნილია. 100%-იანი სიზუსტით ვერ ვამბობ ამას, მაგრამ დიდი ალბათობით ის იყო მოგზავნილი საპატრიარქოდან. მათ ჰყავთ ყველა უბნებში თავისი ხალხი.
_ აქამდე არ გინახავთ და სხვაგან არ შეგხვედრიათ აღნიშნული პირი?
_ არა. არასოდეს.
_ დაახლოებით ერთი წლის წინ იყო, როდესაც სასულიერო სემინარიიდან გაგიშვეს, მას შემდეგ საპატრიარქოდან რაიმე რჩევები თუ გზავნილები არ ყოფილა, რომ გაჩუმებულიყავით და ამის ნაწილი ხომ არ იყო თქვენზე თავდასხმა?
_ არა, პირადად ჩემზე ასეთი არაფერი ყოფილა, მაგრამ ამ ინციდენტს საპატრიარქოდან გზავნილს ვუკავშირებ. რა თქმა უნდა, ეს ვარაუდია და გადაჭრით ვერ ვიტყვი.
_ ანუ ამ ერთი წლის მანძილზე თქვენთან არავითარი კომუნიკაცია არ ყოფილა საპატრიარქოდან?
_ არა. არავითარი.
_ ქვეყნისთვის უფრო მნიშვნელოვან და მასშტაბურ საკითხებზე როგორია თქვენი შეფასება, რატომ გაჯიუტდა საპატრიარქო და რას იღებს ამით ის?
_ საპატრიარქო იღებს დივიდენდებს, იღებს სერიოზულ ძალაუფლებას და გავლენას ხელისუფლებაზე, რაც ნიშნავს იმას, რომ ის კარნახობს სიტუაციას და ასევე იღებს გარკვეულ ფინანსებს. აშკარად უკვე თეოკრატიის ნიშნებია, რაც არღვევს საქართველოს კონსტიტუციას, კერძოდ კი კონკორდატს, რომლითაც გამიჯნულია ეკლესიის და სახელმწიფოს ფუნქციები. ეს ერთი მხრივ საპატრიარქოს ყველანაირ პირობებს უქმნის იმისთვის, რომ რაც უნდა ის აკეთონ, იმიტომ, რომ თითქმის ყოველ წელს არჩევნებია, ამიტომაც ამ ძალაუფლების გაგრძელების მიზნით და საპატრიარქოს დახმარების ხარჯზე ხმების მოხვეჭის მიზნით, ისინი საპატრიარქოს ენის მოჩლეფით ელაპარაკებიან.
საპატრიარქოც იყენებს ამას. თუნდაც, საპატრიარქოს ტყეები უნდა გადაეცეს და. ა. შ. ურთიერთ გამორჩენის საკითხი.
_ ტყეების გადაცემის საკითხი იყო საპატრიარქოს მიზანი ამ ვითარებაში?
_ რა თქმა უნდა, ერთ-ერთი საკითხი იყო ტყეების გადაცემა. ვაჭრობა მიდიოდა. წარმოიდგინეთ, რომ როდესაც ასეთი საშიში ვითარებაა ვირუსის გავრცელების მხრივ, საპატრიარქომ და მისმა მესვეურებმა გამოძებნეს დრო ხელისუფლებასთან ვაჭრობისთვის. საპატრიარქოს პოლიტიკა აჩვენებს, რომ ისინი ამ დივიდენდებს მიიღებდნენ, მაგრამ მაინც არ დაკეტავდნენ მრევლისთვის ტაძრებს.
_ იმას ვერ ხვდებიან, რომ მრევლის ნაწილს და ავტორიტეტს კარგავენ თავისი ქმედებების გამო?
_ სამწუხაროდ, მრევლის ნაწილის დაკარგვა ძალიან ნელი ტემპით მიდის. ვიღაცები ხვდებიან, რომ საპატრიარქო კარგად არ იქცევა. ძალიან ბევრი სასულიერო პირი მირეკავს და მადლობას მეუბნება, რომ მათ სათქმელსაც ვამბობ. ყველა ვერ ბედავს საპატრიარქოს წინააღმდეგ წასვლას, მაგრამ მრევლის დიდი ნაწილი ნაკლებად რეაგირებს ამაზე. მრევლის უმეტესობა ფანატიკურ მდგომარეობაშია და თითქოსდა ღრმად მორწმუნეობის დონეზე, მაგრამ რეალურად ეს არის ფანატიზმი და ამას ქრისტიანობასთან საერთო არაფერი არ აქვს.
გარდა ამისა, ამ შემთხვევაში არის პატრიარქის ერთგვარი ბოღმა, იმის გამო ხელისუფლებამ დეკანოზ გიორგი მამალაძის საქმე ისე არ შეკერა, როგორც ეს საპატრიარქოს უნდოდა. როცა ასეთი მომენტებია, იქნება დივიდენდების მიცემა და ათასი უბედურება, რაც ნორმალურ სახელმწიფოში არ უნდა არსებობდეს. ხელისუფლება საპატრიარქოს წინაშე აბსოლუტურად უძლურია. გამკაცრებული ზომების მიღება სწორედ საპატრიარქოს დესტრუქციული ქმედებების გამო მოხდა.
„ტვ პირველის“ ეთერში ანდრია ჯაღმაიძის ინტერვიუ ადასტურებდა ზუსტად იმას, რომ მათ არანაირი პოზიცია და არანაირი სამართლებრივი უფლებები არ გააჩნიათ იმისა, რომ ამგვარი ნაბიჯები გადაედგათ მათ.
_ ხსენებული ინტერვიუდან გამოჩნდა და შემდეგ პროცესებმაც აჩვენა, რომ საპატრიარქომ მაინც შეარბილა ოდნავ პოზიცია აღდგომასთან დაკავშირებით და აღარ იყო ისეთი ხისტი, როგორც მანამდე გვესმოდა.
_ იმიტომ, რომ ინფექციონისტებმა საკმაოდ მკაცრი განცხადებები გააკეთეს და ისეთი ზომები იყო მიღებული, რაც ძალიან ზღუდავს ადამიანის უფლებებს და იზღუდებოდა გადაადგილების საშუალება, ამიტომ ნაწილობრივ საპატრიარქომაც დაიხია უკან და გარკვეულწილად დათმობაზე წავიდა, მაგრამ ეს მაინც არ არის რეალური დათმობა. ვხედავთ, რომ სამი ადამიანის ერთ სივრცეში ყოფნის პრინციპი მაინც დარღვეულია. დისტანცია როგორც არ უნდა იყოს დაცული ტაძარში, იქ სამ კაცზე მეტია და ეს უკვე ნიშნავს იმას, რომ დარღვეულია ის რეგულაცია, რაც სახელმწიფოს მიერ არის გამოცემული.
ამას რა ეშველება, არ ვიცი. ვნახეთ, რომ ზოგიერთმა ეპისკოპოსმა წირვა დილით ჩაატარა, მაგრამ ეს აბსოლუტურად არაფერს არ ცვლის, რადგან სამი კაცის პრინციპი ყველა შემთხვევაში ირღვევა.
_ ცალკეული ეპისკოპოსების განსხვავებული პოზიციები მოვისმინეთ, ეს რაზე მიანიშნებს, რომ საპატრიარქოში აზრთა სხვადასხვაობაა?
_ რა თქმა უნდა. ვადასტურებ, რომ საპატრიარქოში აზრთა სხვადასხვაობა არსებობს.
_ ბოლო პერიოდში გამოჩნდა, რომ სხვადასხვა ჯგუფია საპატრიარქოში. გამოჩნდნენ მეუფეები, რომლებიც შედარებით უფრო რაციონალურად უდგებიან საკითხებს და არიან ისინი, ვინც საკუთარი გავლენისთვის იბრძვიან. ამ შემთხვევაშიც იყო თუ არა შიგნით გარკვეული დაპირისპირება და ბრძოლა, თუ რომელი აზრი გაიმარჯვებდა?
_ არა, დაპირისპირებები არ ყოფილა, უბრალოდ, ზოგიერთმა ეპისკოპოსმა მეტ-ნაკლებად რბილი პოზიცია დაიკავა და თქვა, რომ ღამე აღარ ჩაატარებდა წირვას და ჩაატარა დილით.
_ რაც საჯაროდ გაცხადდა, ვიცით, მაგრამ შიგნიდანაც ხომ არ გაქვთ რაიმე ინფორმაცია?
_ არა, ამ შემთხვევაში არანაირი ინფორმაცია არ მაქვს, რომ ეპისკოპოსებს შორის შეიძლება ყოფილიყო დაპირისპირება. ამას ნამდვილად გავიგებდი. არანაირი დაპირისპირება არ ყოფილა, უბრალოდ მათ თავისი ინციატივით გააკეთეს ეს განცხადება. რა თქმა უნდა, ეს უკეთესი პოზიციაა, ვიდრე საპატრიარქოსი, მაგრამ საერთო ჯამში ბევრი არაფერი შეცვლილა ამით.
_ საერთოდ როგორი ვითარებაა საპატრიარქოში, რომელი ჯგუფია დღეს ყველაზე გავლენიანი?
_ საპატრიარქოში რა თქმა უნდა ყველაზე დიდი გავლენა პატრიარქის და შორენა თეთრუაშვილის ჯგუფს აქვს, ისინი კარნახობენ სიტუაციას საქართველოს მართლმადიდებლურ ეკლესიას.
_ ამ ჯგუფშია მეუფე შიოც?
_ რა თქმა უნდა. შიოც ამ ჯგუფშია და მათი კარნახით იმართება პროცესები.
_ მეუფე იაკობი ვის ჯგუფშია?
_ მეუფე იაკობიც მანდ არის.
_ მეუფე იობი?
_ იობი თავისთვის არის, მაგრამ იობი იმდენად მხდალია, რომ კრიტიკულ მომენტში ყოველთვის პატრიარქის პოზიციას იკავებს. ეპისკოპოსთა დიდი ნაწილი არის კორუმპირებული, არის სავსე კომპრომატებით და ამას შორენა თეთრუაშვილი იყენებს ძალიან ოსტატურად. როდესაც რომელიმე ეპისკოპოსი მოინდომებს რაიმეს გაპროტესტებას, ან სხვანაირად წარმოჩენას, მაშინვე მათ ამ კომპრომატებს უდებენ წინ და მათ აჩერებენ. ეს არის ამ სინოდის მთელი პრობლემა. ამ სინოდის ეპისკოპოსთა 95% უნდა გადადგნენ და წავიდნენ, სხვანაირად საქართველოს ეკლესიაში არაფერი არ შეიცვლება. ეს სინოდი ქართველ ერს კარგს არაფერს არ მოუტანს.
_ რამდენიმე დღის წინ თეოლოგმა ბექა მინდიაშვილმა თქვა, რომ საზოგადოებამ საპატრიარქოს გადაყენება უნდა მოითხოვოს პატრიარქის მეთაურობითო. იზიარებთ ამ პოზიციას თუ განსხვავებული ხედვა გაქვთ?
_ რა თქმა უნდა ამ აზრს ვემხრობი, მაგრამ რამდენად ეფექტური იქნება ამ ხელისუფლების პირობებში, არ ვიცი. შეიძლება დარჩეს 3-4 ეპისკოპოსი, რომლებიც თავისი აზროვნებით პროდასავლურები არიან. თუ გადაყენებულთა შორის იქნება აუცილებლად მეუფე შიოც, მაშინ დავეთანხმები. აუცილებელია, რომ სწრაფად მოხდეს ახალი სინოდის შეკრება, ახალი კანდიდატების დასახელება, რომლებიც იქნებიან განათლებული ხალხი. ამასთან არ არის საჭირო ამდენი ეპისკოპოსი, 15-მდე ეპისკოპოსი სავსებით საკმარისია, საქართველოს ეკლესიას მეტი არ სჭირდება. შემდეგ უნდა მოხდეს ამ სინოდის მიერ პატრიარქის არჩევა და სინოდმა უნდა დაიწყოს ყოველდღიურ რეჟიმში მუშაობა, რადგან უამრავი პრობლემებია გადასაწყვეტი საქართველოს ეკლესიაში.
_ დღეს პატრიარქი მართავს პროცესებს რეალურად თუ დღეს მისი ფიზიკური მდგომარეობიდან გამომდინარე ნომინალური ფიგურაა?
_ მართავს. ნუ გგონიათ რომ ვერ მართავს. მას ფიზიკურად არ შეუძლია გადაადგილება, თორემ პროცესებს ეგ და შორენა მართავენ, რა თქმა უნდა მოსკოვის დირექტივებით. მოსკოვის ფაქტორის გამორიცხვა არაფრით არ შეიძლება. მოსკოვიდან ხდება ყველა დირექტივის მიღება. რა თქმა უნდა აქვთ შიდა ინტერესებიც, რასაც მოსკოვს არ უთანხმებენ, მაგრამ სტრატეგიულ საკითხებში, ყველაფერს მოსკოვს უთანხმებენ.
შორენა თეთრუაშვილი არის ადამიანი, რომელიც პირდაპირ მოსკოვთან არის კავშირზე.